मकवानपुरमा करिब ४० हजार मतदाता थपिए

 

मकवानपुर - नजिकै गरेको स्थानीय तहको निर्वाचनमा मकवानपुर जिल्लामा गत निर्वाचनको भन्दा थप ४० हजार जनाले भोट हाल्ने भएका छन् ।

पछिल्लो जनगणना अनुसार मकवानपुरमा मतदाताको संख्या २ लाख ९५ हजार ५ सय ५० पुगेको छ । २०७४ सालको निर्वाचनमा मकवानपुरमा २ लाख ५५ हजार ६ सय ४ जना मतदाता थिए । यो संख्या २०७४ सालको प्रदेश तथा प्रतिनिधिसभा निर्वाचनको समयको हो ।

२०७४ सालमा सम्पन्न स्थानीय तह निर्वाचनमा भने मकवानपुरमा २ लाख २७ हजार ७ सय ५९ जना मतदाता थिए ।

जिल्ला निर्वाचन व्यवस्थापन समिति मकवानपुरले आसन्न स्थानीय तह निर्वाचनलाई लक्षित गर्दै कार्यक्रम तयार पार्न सुरु गरेको प्रमुख जिल्ला अधिकारीको संयोजकत्वमा रहने निर्वाचन व्यवस्थापन समितिले जनाएको छ । मतदानस्थलको सुरक्षा समवेदनशिलताबारे अध्ययन तथा व्यवस्थापनको तयारी थालेको समितिका संयोजक तथा मकवानपुर जिल्लाका प्रमुख जिल्ला अधिकारी भरतमणी पाण्डेले बताए ।

पाण्डेका अनुसार मकवानपुरको इन्द्रसरोवर गाउँपालिकामा १२ हजार ४९५ मतदाता रहेका छन् । यसैगरी जिल्लाको कैलाश गाउँपालिकामा १४ हजार ६२०, थाहा नगरपालिकामा ३२ हजार ३१६, बकैया गाउँपालिकामा ३० हजार ०१३, बागमती गाउँपालिकामा २२ हजार ०९० मतदाता छन् ।

यसैगरी जिल्लाको भीमफेदी गाउँपालिकामा १७ हजार ४४७, मकवानपुरगढी गाउँपालिकामा १९ हजार १५०, मनहरी गाउँपालिकामा २६ हजार ७५१ र राक्सिराङ गाउँपालिकामा १५ हजार ८७३ जना मतदाता रहेका छन् । 

निर्वाचनको मिति नजिकिँदै गर्दा उम्मेदवारको चर्चा बजारमा सुरू भएको छ ।