‘प्रेमगन्ज’सँगै रिलिज हुने भयो ‘कृष्णलीला’

काठमाडौँ - दिनहुँ नयाँ फिल्मले प्रदर्शन मिति घोषणा गरिरहेका छन् । चलचित्र संघले एक हप्तामा एउटा मात्र फिल्म रिलिज गर्न सकिने नियम बनाए पनि निर्माताले अटेर गर्न थालेका छन् । एकै हप्ता दुई दुई नेपाली फिल्मले प्रदर्शन मिति बुक गर्न थालेका छन् । यसमा पनि खासगरि भदौमा चाप देखिएको छ । 

भदौ १० मा अल्लि पहिले ‘पानीफोटो’ले प्रदर्शन हुने घोषणा गरेको थियो तर यसको केही दिनपछि ‘प्रकाश’ले पनि यही मितिमा आउने घोषणा गर्यो । फेरि भदौमा नै थप दुई फिल्म एकै मितिमा आउने भएका छन् । ती फिल्म हुन् ‘प्रेमगन्ज’ र ‘कृष्णलीला’ ।

‘कृष्णलीला’ले मंगलबार नयाँ पोस्टर जारी गर्दै आउँदो वर्षको भदौ ३ लाई बुक गरेको हो । यसअघि नै सोही मितिमा ‘प्रेमगन्ज’ले आउने घोषणा गरिसकेको छ । दीपक वलीको निर्देशन रहेको ‘कृष्णलीला’मा पुष्प खड्का र श्रद्धा क्षेत्रीको मुख्य भूमिका रहेको छ । यसैगरि ‘प्रेमगन्ज’मा बेनिशा हमालले तेज गिरीसँग रोमान्स गरेकी छिन् ।