औषधि खरिद–ढुवानीमा नक्कली बिल बनाउनेहरु भ्रष्टाचार फन्दामा

काठमाडौं– औषधि खरिद तथा ढुवानीको नक्कली बिल भपाईका आधारमा सरकारी रकम हिनामिना गर्ने वडाध्यक्षसहित सरकारी कर्मचारीहरुविरुद्ध भ्रष्टाचार मुद्दा दायर भएको छ । 

अख्तियार दुरुपयोग अनुसन्धान आयोगले हुम्लाको सर्केगाड गाउँपालिका–३ का वडाध्यक्ष गजबहादुर रावत, स्वास्थ्य संयोजक सन्तोष धामी, तत्कालीन प्रमुख प्रशासकीय अधिकृत यज्ञश्वर पाण्डे, तत्कालीन लेखापाल सुरतबहादुर रेश्मीविरुद्ध ८ लाख रुपैयाँ भ्रष्टाचार गरेको अभियोग लगाउँदै बिहीबार विशेष अदालतमा मुद्दा दायर गरेको हो ।

आयोगले भ्रष्टाचार निवारण ऐन ती प्रतिवादीहरुबाट उक्त रकम असुल गर्नुपर्ने, बिगो बमोजिम जरिवाना र अधिकतम कैद सजायको माग गरेको छ ।

तिनीहरुले मिलेमतोमा आफू वा अन्य व्यक्तिलाई लाभ लिंँदै सरकारलाई हानी नोक्सानी पुर्‍याउने बदनियतले औषधि खरिद तथा ढुवानीको नक्कली बिल भरपाई तयार गरेको अभियोग आयोगले लगाएको छ । आयोगका अनुसार, बिभिन्न व्यक्तिहरुले रकम बुझेको भरपाई बनाई, प्राप्त बिल भरपाईको सत्यतथ्य जाँच नगरी भुक्तानीका लागि सिफारिस गर्नुका साथै ८ लाख रुपैयाँ अनुचित भुक्तानी लिएका हुन् ।