प्राधिकरणले ल्यायो एक युनिटको ३८ रुपैयाँ पर्ने बिजुली : एकैदिन १४ करोड घाटा

भारतीय ऊर्जा बजारमा आजको मूल्य ।

काठमाडौँ- नेपाल विद्युत् प्राधिकरणले प्रतियुनिट ३८ रुपैयाँ तिरेर २०० मेगावाट भारतीय बिजुली ल्याएको छ । प्राधिकरणले भारतको इनर्जी एक्सचेञ्ज (आईआईएक्स) का ९६ वटै ब्लकहरूमा प्रतियुनिट भारु २० रुपैयाँ कबोल गरेपछि बिजुली पाएको हो ।

प्रसारण शुल्क, चुहावट, प्रशासनिक तथा प्राविधिक सबै गर्दा यो बिजुलीको एक युनिटको लागत ३८ रुपैयाँ परेको छ । प्राधिकरणले आयात गरेको ४८ लाख युनिट बिजुलीको एकमुष्ठ मूल्य १८ करोड २४ लाख रुपैयाँ परेको हो । यो बिजुली अब प्राधिकरणले उद्योगलाई प्रतियुनिट ९ रुपैयाँमा बेच्छ ।

यसरी बेचिएको बिजुलीबाट प्राधिकरणलाई एक दिनमा १३ करोड ९२ लाख रुपैयाँ घाटा परेको छ । नेपाल आयल निगमले पनि परल मूल्यभन्दा थोरैमा बेच्न थालेपछि टाट पल्टने स्थितिमा पुगेको छ । प्राधिकरणका प्रवक्ता सुरेशबहादुर भट्टराईका अनुसार इण्डियन इनर्जी एक्सचेञ्जमा भोलि र पर्सी पनि यसैगरी अधिकतम मूल्यमै बिजुली आयात गरिनेछ । ‘हामीले थेगुञ्जेल ल्याउँछौं’ प्रवक्ता भट्टराईले शुक्रबार इकागजसँग भने, ‘उद्योगपतिहरूसँग पनि छलफल गर्दैछौं ।’

प्राधिकरणले उद्योगलाई यतिखेर नियमित रुपमा बिजुली आपूर्ति गरेको छ ।  ऊर्जा मन्त्रालय स्रोतका अनुसार ऊर्जा मन्त्री पम्फा भुसाल र अर्थ मन्त्री जनार्दन शर्माको दबाबमा ‘उद्योगपतिलाई असर नपार्न’ यति धेरै मूल्य चुकाएर बिजुली ल्याइएको हो । आईआईएक्सको ९६ वटा ब्लकमा यसअघि प्राधिकरणले हालेको मूल्यमा नपरेपछि उद्योगलाई केही बिजुली कटौती गरिएको थियो । तर त्यसको भोलिपल्टै मन्त्रीद्वयले दबाब दिएपछि प्राधिकरणले प्रतियुनिट ३८ रुपैयाँ हालेर भए पनि खरिद गर्न बाध्य भएको हो ।

थेग्ने नसक्नी अचाक्ली महँगो बिजुली खरिद गरिएको प्राधिकरणको कर्मचारी युनियनले विरोध गरेका छन् । प्राधिकरणको राष्ट्रिय कर्मचारी युनियनका अध्यक्ष रामेश्वरप्रसाद पौडेलले महँगो बिजुली आयात गर्ने हो भने सरकारले त्यसको शोधभर्ना गरिदिनुपर्ने बताए । ‘प्राधिकरणले यो बिजुली थेग्न सक्दैन, कि सरकारले हालिदिनुपर्‍यो होइन भने आयात गर्नु भएन,’ अध्यक्ष पौडेलले इकागजसँग भने, ‘हामी साथीहरू र अरु युनियनहरूसँग पनि छलफल गर्नेछौं ।’