दुई दिनमा चीनबाट भित्रियो ४० लाख खोप

काठमाडौँ- चीन सरकारको सहयोगमा कोभिड –१९ विरुद्धको ४० लाख खोप नेपाल ल्याइएको छ । आइतबार ३५ लाख र सोमबार ५ लाख खोप ल्याइएको स्वास्थ्य सेवा विभाग अन्तर्गत आपूर्ति व्यवस्थापन महाशाखाले जनाएको छ ।  

चीन सरकारको सहयोगमा सिनोभ्याकको खोप ल्याइएको महाशाखाका प्रमुख डा. सुरेश चौरसियाले जानकारी दिए । उनका अनुसार सिनोभ्याक खोप भेरोसेल जस्तै  रहेको छ ।

'दुई डोज लगाउनुपर्छ', उनले भने,' आवश्यकता अनुसार सबैलाई यो खोप उपलब्ध वितरण गरिन्छ ।' अतिरिक्त र नियमित खोप आवश्यक परेकालाई लगाइने उनले जानकारी दिए ।

नेपालमा हालसम्म विभिन्न मुलुकबाट अनुदान तथा खरिद गरेर कुल ४ करोड ७८ लाख ८२ हजार ८०० खोप प्राप्त भएको छ । कोभिशिल्ड, भेरोसेल, जोनसन एण्ड जोनसन्, फाइजर, अष्ट्राजेनिका खोप विभिन्न मुलुकबाट ल्याइएको छ ।

स्वास्थ्य मन्त्रालयका अनुसार  हालसम्म नेपालमा खोप अभियान सुरु भएदेखि विभिन्‍न उमेर समूहका गरी ३ करोड ९८ लाख २४ हजार ७८ मात्रा लगाइएको छ । गत वर्ष माघको दोस्रो सातादेखि कोभिडविरुद्धको खोप लगाउन थालिएको हो ।

भारतबाट अनुदान प्राप्त कोभिशिल्ड खोप लगाइएको थियो । फ्रन्टलाइनरमा काम गर्नेलाई पहिलो चरणमा लगाइएको थियो ।

पहिलो मात्रा १ करोड ८७ लाख ४५ हजार १२०, पूर्ण मात्रा १ करोड ८९ लाख ८७ हजार २२९ र अतिरिक्त मात्रा २० लाख ९१ हजार ७२९ जनाले खोप लगाइसकेका छन्।