'अघोषित लोडसेडिङ'ले हेटौंडाका उद्योग मारमा, ५० प्रतिशतसम्म उत्पादन कटौती

मकवानपुर - नेपाल विद्युत प्राधिकरणले भारतबाट आयात हुने बिजुली आयात गर्न समस्या परेका कारण विद्युत् आपूर्ति  बन्द हुँदा हेटौंडाका उद्योगहरू मारमा परेका छन् ।

कोरोना भाइसरको संक्रमणको कारण बन्द रहेका उद्योगहरू विस्तारै बाँमे सर्न लागेको बेला अघोषित लोडसेडिङ हुँदा फेरि समस्या परेको हेटौंडा औद्योगिक क्षेत्र व्यवस्थापन प्रमुख राजेन्द्र कँडेलले बताए । लगातार १४ घण्टासम्म बत्ति काटिएको कारण उद्योग सञ्चालनमा समस्या भएको उनको भनाइ छ । 

शनिबार ७ घन्टा, आइतबार १२ घन्टा र सोमबार १४ घन्टा बत्ती काटिएको उनले बताए । आज मंगलबार पनि बिहान ६ बजेपछि मात्रै बत्ति आएको र साँझ पनि बत्ती काटिने सम्भावना रहेको उनले बताए ।

भारतबाट आयात हुने बिजुली आयात गर्न समस्या परेका कारण देखाउँदै प्राधिकरणले बत्ति काटेपछि हेटौंडाको मात्रै हैन देशका तीन ठूला औद्योगिक करिडोरसहित सयौं उद्योगमा विद्युत् आपूर्ति प्रभावित भएको छ । गत मंगलबार साँझबाट रोकिएको विद्युतको आपूर्ति केही ठाउँमा बुधबार बिहान र केही क्षेत्रमा दिउँसो मात्रै फेरि सुरु भएको थियो ।

हेटौंडा औद्योगिक क्षेत्रभित्र मात्रै चालू अवस्थाका एकसय १० वटा उद्योगसहित १३ वटा संघसंस्था तथा कार्यालयहरू छन् । औद्योगिक क्षेत्रको विद्युत काटिदा उद्योगसँगै यहाँका सरकारी कार्यालयहरू पनि प्रभावित भएका छन् ।  उद्योगको करिब ५० प्रतिशत उत्पादन कटौती भएको कँडेलले बताए ।

बैंक ब्याजदर, तरलता अभावबाट जुध्दै गरेका उद्योगीहरू अब विद्युत् आपूर्तिको समस्याबाट पीडित हुनुपर्ने अवस्था आएको भन्दै उद्योगिहरू निराश भएका छन् । ‘यो अवस्थाले उद्योगहरूलाई भयावह अवस्थामा पुर्‍याउने छ,' कँडेलले भने । 

भारतबाट आउने तीन सय मेगावट बिजुलीमध्ये केही परिमाणको आयात रोकिएपछि औद्योगिक क्षेत्रमा मात्रै लाइन काटिएको जानकारी प्राधिकरणले गराएको छ ।

बिजुली आपूर्तिको सुनिश्चितता नहुँदा ओद्योगिक उत्पादनमा ठूलो समस्या देखिएको कँडेलले बताए । विद्युत आपूर्ति नहुँदा  उद्योगको उत्पादन मात्रै हैन निर्माण कार्य समते प्रभावित भएको उनले बताए । 

हेटौंडा औद्योगिक क्षेत्रभित्र मात्रै हाल झण्डै २ दर्जन उद्योगहरू निर्माणधीन छन् । बत्ती काटिदा निर्माण कार्य समेत प्रभावित भएको छ ।

भारतबाट बिजुली किन्न गरिएको प्रतिस्पर्धामा प्राधिकरणलाई ‘बिड’ नपरेका कारण बिजुलीको आयात प्रभावित भएको प्राधिकरणले जनाएको छ । नेपालले भारतसँग प्रति युनिट भारु ६ देखि ७ रुपैयाँमा बिजुली किन्ने गरेको थियो । 

गत मंगलबारको प्रतिस्पर्धामा नेपालले भन्दा महँगोमा बिजुली किन्न भारतीय कम्पनीहरू तयार भएपछि नेपाललाई समस्या भएको बताइएको छ । नेपालले प्रतियुनिट ८ रुपैयाँ भारु बोलकबोल गरेकामा बिजुली प्रतियुनिट १२ रुपैयाँ भारुमा अन्यत्र बिक्री हुने भएपछि नेपालमा आपूर्ति रोकिएको हो ।

भारतसँग नेपालले दैनिक औसत ५ सय मेगावट बिजुली आयात गरिरहेकोमा बिहारबाट आउने तीन सय मेगावट बिजुलीको आयात पनि प्रभावित भएको प्राधिकरणले जनाएको छ । 

उत्पादित विद्युत भारतमै खपत बढेको भन्दै सम्झौताअनुसार बिजुली दिन भारत तयार नभएपछि थप समस्या देखिएको हो ।