एएफसी कप छनोटका लागि ब्लु स्टार नेपालमा

काठमाडौं – एएफसी कप छनोट अन्तर्गत प्रारम्भिक चरणको खेलका लागि श्रीलंकाको ब्लु स्टार स्पोर्टस क्लब काठमाडौं आईपुगेको छ । आगामी मंगलबार ब्लु स्टारले त्रिपुरेश्वरस्थित दशरथ रंगशालामा नेपालको ए डिभिजन लिग च्याम्पियन मछिन्द्र क्लबविरुद्ध खेल्नेछ । 

श्रीलंकन टोली बिहीबार काठमाडौं आईपुगेको हो । मछिन्द्र क्लबका पदाधिकारीले ब्लु स्टार टिमलाई विमान स्थलमा स्वागत गरेका थिए ।  ब्लु स्टार र मछिन्द्रबीच हुने खेलको विजेताले दोस्रो चरणमा भारतको मोहन बगानविरुद्ध खेल्नेछ । उक्त खेल खेल अप्रिल १२ मा हुनेछ ।

मछिन्द्रले लगातार दोस्रो पटक ए डिभिजन लिगको उपाधि हात पारेपनि पहिलो पटक एएफसी कप छनोट खेल्न लागेको हो । यस अघि मछिन्द्रसँग क्लब लाइसेन्स नभएका कारण उक्त मौका गुमाउने पुगेको थियो ।