मलेसियालाई नेपालको २२४ रनको लक्ष्य

काठमाडौँ – त्रिकोणात्मक टी–ट्वान्टी सिरिज अन्तर्गत नेपालले मलेसियासामु २ सय २४ रनको लक्ष्य दिएको छ । त्रिवी क्रिकेट मैदानमा टस हारेर पहिले ब्याटिङ गरेको नेपालले निर्धारित २० ओभरमा ५ विकेट गुमाएर २ सय २३ रन जोड्यो । 

नेपालका लागि दिपेन्द्र सिंह ऐरीले शतक पुरा गरे । दिपेन्द्रले ५७ बलमा १ सय १० रन जोड्दा १० चौका र ६ छक्का प्रहार गरे । टी–ट्वान्टीमा दिपेन्द्रको पहिलो शतक हो । 
रोहित पौडेलले ३४ बलमा ५१ रन जोडे । उनको यो पहिलो अर्धशतक हो । आदिल अन्सारीले १४ रन जोडे । ओपनर आशिफ शेख १८ तथा कुशल भुर्तेल १२ रनमा आउट भए । 

मलेसियाका लागि मुहमद वफिक, पवनदिप सिंह, स्याजरुल इदरुस र मुहमद आमिरले एक–एक विकेट हात पारे ।