भिरबाट लडेर एकको मृत्यु

बनेपा  : काभ्रेपलाञ्‍चोकको बेथानचोक गाउँपालिका-३ नारायणस्थान डाँडामा भिरबाट लडेर एक जनाको मृत्यु भएको छ । शनिबार राति २ : ०० बजेतिर शौचालय जाने क्रममा चिप्लेर भिरबाट लडेर धुलिखेल नगरपालिका-४ केयुमा कार्यरत वडा नं ७ का २६ वर्षीय निरोज रिजालको मृत्यु भएको इलाका प्रहरी कार्यालय बनेपाका प्रहरी निरीक्षक योगेन्द्र तिमल्सिनाले जानकारी दिए । 

उनका अनुसार रिजाल धुलिखेल नगरपालिका-४ केयुको सूचना प्रविधिमा कार्यरत थिए । शौचालय जाने क्रममा चिप्लेर भिरबाट करिब छ/सात सय मिटर तल खसेर अड्केको अवस्थामा प्रहरी र नेपाली सेनाको संयुक्त उद्धार टोलीले शव निकालेको हो । 

उनको शव परीक्षणका लागि धुलिखेल अस्पतालमा राखिएको प्रहरीले जनाएको छ । बेथानचोक नारायणस्थान घुम्‍नका लागि चार जनाको टोली शुक्रबार राति पुगेको र शौचालय जाने क्रममा घटना भएको प्रहरीले जनाएको छ । (रासस)