‘ए मेरो हजुर ४’को नयाँ गीत सार्वजनिक

काठमाडौँ - वैशाख १ गतेबाट प्रदर्शनमा आउन लागेको ‘ए मेरो हजुर ४’ ले फिल्ममा समावेश तेस्रो गीत सार्वजनिक गरेको छ । ‘तिमी र म’बोलको गीतमा  प्रतिक पौडेलको शब्द तथा संगीत र उदयराज पौडेलको स्वर रहेको छ ।

गीतको ब्याक भोकलमा प्रश्ना शाक्यले साथ दिएकी छन् । रामजी लामिछानेको कोरियोग्राफी रहेको गीतलाई गायक पौडेल स्वंयमले एरेञ्ज गरेका हुन् । सार्वजनिक गीतमा फिल्मका मुख्य कलाकार अनमोल केसी र सुहाना थापाले नृत्य गरेका छन् । 

अभिनेत्री झरना थापा निर्देशित तेस्रो फिल्म ‘ए मेरो हजुर ४’ मा अनमोल र सुहानाका अलवा सलोन बस्नेत, रवि गिरी, सरोज खनाल, लुनिभा तुलाधर, रक्षा गौतम लगायतका कलाकारको अभिनय रहेको छ । सुनिल कुमार थापाले निर्माण गरेको फिल्ममा मित्र डि गुरुङको सम्पादन, रामजी लामिछाने र कविराज गहतराजको कोरियोग्राफी र हिमाल केसीको द्वन्द्व निर्देशन रहेको छ ।

फिल्मको कथा निर्देशक तथा अभिनेत्री झरना थापाले लेखेकी हुन् । सुहाना इन्टरटेनमेन्ट र सुनिल कुमार थापा प्रोडक्सनको ब्यानरमा निर्माण भएको फिल्मको पटकथा र संवाद लेखनमा निर्देशक थापालाई स्व. निर्देशक छेतेन गुरुङ, मन्दिप गौतम, प्रतिक पौडेल, बाबुराम दाहाल, उपकार पाण्डे र माधव शर्माले सघाएका छन् ।