बिहारमा चुनावका कारण नेपाल-भारत सीमा बन्द

काठमाडौं : भारतको बिहारमा शनिबार हुने निर्वाचनका कारण विराटनगर जोगबनीसहित सीमा क्षेत्रमा आवातजावतमा पूर्ण रोक लगाइएको छ । जिल्ला प्रहरी कार्यालय मोरङ्गका प्रहरी प्रमुख प्रहरी उपरीक्षक सन्तोष खड्काका अनुसार विधानसभा सदस्यको तेस्रोचरणको निर्वाचनलाई लक्षित सीमामा सरक्षा अवस्था कडाई बनाइएको हो ।

दुबै क्षेत्रमा आवातजावतमा कडाई गर्दै उच्च सतर्कता अपनाइएको उनले बताए। मोरङसँग जाेडिएकाे विहारको अररीया जिल्लामा पनि निर्वाचन हुने भएपछि शुक्रबारबाट नेपालतर्फ उच्च सतर्कता अपनाइएको हो ।

निर्वाचनका बेला घुसपैठ र अपराधिक घटना हुन नदिन र सहज आवतजावत गर्न नसकुन् भनेर सीमा क्षेत्रमा निगरानी बढाएर सुरक्षा कडाई गरिएको खड्काको भनाइ छ । यसका लागि भारतका सुरक्षा निकायले पटक पटक निर्वाचनका समयमा सीमा क्षेत्रमा निगरानी बढाएर कडाई गर्न आग्रह गर्दै आएका छन्। हाल नेपालतर्फको भूभागमा सशस्त्र र नेपाल प्रहरीको संयुक्त टोलीले सुरक्षा प्रदान गरिरहेको छ ।

त्यसैगरि भारततर्फ पनि भारतीय सुरक्षाकर्मीको उपस्थिति बाक्लो बनाएर कडाई गरिएको छ। निर्वाचन नसकिएसम्म भारतसँग सीमा जोडिएको मोरङको ६३ किलोमिटर क्षेत्रलाई नेपाली सुरक्षाकर्मीले उच्च निगरानीमा रहने प्रहरीको भनाइ छ ।