म्यानचेस्टर सिटीमाथि तीन वर्षदेखि छानविन भइरहेको खुलासा

काठमाडौँ- इंग्लिस प्रिमियर लिग क्लब म्यानचेस्टर सिटीमाथि नियम उल्लंघन गरेको विषयमा छानविन भइरहेको छ । प्रिमियर लिगले विगत तीन वर्षदेखि सिटीमाथि अनुसन्धान गरिरहेको जर्मनीको डेर स्पाइजेल पत्रिकलाई उदृत गर्दै बीबीसीले जनाएको छ । 

छानविन युवा खेलाडीहरूलाई अवैधरुपमा भुक्तानी गरेको, प्रायोजन सम्झौता बढाएर गरेको तथा पूर्व प्रशिक्षकहरुलाई लुकाएर तलब भुक्तानी गरेको विषयमा केन्द्रित रहेको छ । डेर स्पाजेलले भने पत्रकारहरुको सञ्जाल युरोपियन इन्भेस्टिगेटिभ कोलाबोरेसन्ससँग मिलेर गरेको छानविननै प्रकाशित गरेको छ । 

यसले प्रिमियर लिगबाट भइरहेको तीन वटै छानविनको विषयको बारेमा विस्तारमा विवरणहरू प्रकाशित गरेको छ । तर प्रिमियर लिग र सिटीले भने यस विषयमा कुनै प्रतिक्रिया दिएको छैन ।

यता डेर स्पाइजेलले सिटीले युवा खेलाडीहरुलाई नियमको उल्लंघन गरी मौद्रिक भुक्तानीमार्फत म्यानचेस्टर सिटीसँग सम्झौता गर्न दबाब दिएको उल्लेख गरेको छ । 
उक्त पत्रिकाले दाबी गरे अनुसार अबुधावीका क्लबका प्रायोजकले उक्त सम्झौता रकमको केही भाग क्लबलाई दिएर बाँकी आफै राखेका थिए ।