अस्पताल निर्माणविरुद्ध वडाध्यक्ष नै आन्दोलित

जनकपुरधाम : सप्तरीमा वडास्तरीय आधारभूत अस्पतालका लागि जनप्रतिनिधिविरुद्ध जनप्रतिनिधि नै  आन्दोलनमा उत्रेका छन् ।  खडकपुर नगरपालिका-८ मा निर्माण हुन लागेको १५ सैयाको आधारभूत अस्पताल निर्माणविरुद्ध वडा नम्बर ७ का अध्यक्ष नै आन्दोलनमा उत्रिएका हुन् । आफूहरूलाई भ्रममा राखेर अस्पताल निर्माण गर्न लागिएको भन्दै वडाध्यक्षा राकेश कुमार साहको नेतृत्वमा आन्दोलन सुरु भएको हो । 

स्वास्थ्य तथा जनसंख्या मन्त्रालयको परिपत्र अनुसार फाल्गुन २६ गते कार्यपालिका बैठकबाट वडा नम्बर ८ मा १५ सैयाको आधारभूत अस्पताल बनाउने निर्णय गरिएको थियो । त्यसका लागि स्थानीय लोकेन्द्रनारायण श्रेष्ठ ,सुर्यनारायण श्रेष्ठ र दिपक कुमार श्रेष्ठको संयुक्त नाममा रहेको ०-१-१५-१९ जग्गा निःशुल्क लिने निर्णय समेत गरिएको थियो ।

बोर्डको निर्णयविरुद्ध वडाध्यक्ष राकेश कुमारको नेतृत्वमा आन्दोलन भएको हो । वडा नम्बर-८ मा अस्पताल बनाउने निर्णय बदरगरी प्राथमिक स्वास्थ्य केन्द्र कल्याणपुरलाई स्तरोन्‍नतिको गर्नु पर्ने माग उनीहरूको छ । 

वडाध्यक्ष साहले नगर भित्र रहेको काल्यणपुर स्वास्थ्य चौकीलाई स्तरोन्‍नति गर्न फाल्गुन २९ गते नगर उपप्रमुख यासमिन सुल्तान अध्यक्षतामा स्थानीयवासी, राजनीतिक दल र जनप्रतिनिधिहरूको बैठक निर्णय गरिएको र त्यो निर्णयविपरीत अर्को निर्णय भएको बताए ।