वालिङ जीप दुर्घटना: मृतकको संख्या पाँच पुग्यो

पोखरा - स्याङजामा भएको जीप दुर्घटनामा मृत्यु हुनेको संख्या पाँच पुगेको छ । वालिङ नगरपालिका-१२ डाँडाखर्कस्थित आइतबार बिहान करिब साढे १० बजे भएको जीप दुर्घटनामा एक बालकसहित पाँच जनाको मृत्यु जिल्ला प्रहरी कार्यालय स्याङ्जाले जनाएको छ ।  

डाँडाखर्कबाट वालिङ बजारतर्फ छुटेको ग १ ज ७३९९ नम्बरको जीप दुर्घटना भएको जिल्ला प्रहरी कार्यालयका प्रहरी निरीक्षक पदमराज थापाले जानकारी दिए । उनका अनुसार जीपमा ११ जना सवार थिए । 

मृतक पाँच जनाको शव वालिङ प्राथमिक स्वास्थ्य केन्द्रमा राखिएको छ । मृतकहरू सबै वालिङकै भएको हुनसक्ने भए पनि परिचय खुलाउने काम भइरहेको उनको भनाइ छ । 

जीप सडकबाट झण्डै १०० मिटर तल खसेको प्रहरीले जनाएको छ ।