स्वामित्व परिवर्तनले क्लब विचलित नहुने एसी मिलानका स्टेफानोको भनाइ

काठमाडौँ – इटालियन फुटबल क्लब एसी मिलानका मुख्य प्रशिक्षक स्टेफानो पियोलोले सम्भावित स्वामित्व परिवर्तनले क्लब विचलित नहुने बताएका छन् । पियोलोले एसी मिलानका खेलाडी इन्टर मिलनविरुद्ध हुने कोपा इटालिया अन्तर्गतको सेमिफाइनलको दोस्रो लेगमा केन्द्रित रहेको बताए ।

बहराइनको इन्भेष्टकर्पले एसी मिलान खरिद गर्न लागेको चर्चा चलिरहेको समयमा क्लबका मुख्य प्रशिक्षक पियोलोले यसबाट क्लब र खेलाडी विचलित नहुने बताएका हुन् ।

एक पत्रकार सम्मेलनका क्रममा प्रशिक्षक पियोलोले यसबारे कसैसँग कुरा नभएको तथा आफूहरुको ध्यान इन्टर मिलनविरुद्धको खेलमा रहेको उल्लेख गरे । 

उनले क्लब आफूहरुको धेरै नजिक रहेको तथा क्लबको वर्तमान धेरै वलियो भएको र भविष्य झनै राम्रो हुने विश्वास व्यक्त गरे ।