ह्युस्टन फिल्म फेस्टिभलमा अभिनेता महेश त्रिपाठी उत्कृष्ट अभिनेताको मनोनयनमा

काठमाडौँ - अभिनेता महेश त्रिपाठी अमेरिकाको टेक्सासमा चलिरहेको ह्युस्टन फिल्म फेस्टिभलमा उत्कृष्ट अभिनेताको मनोनयनमा परेका छन् । आजबाट सुरु भएको वल्र्ड फेस्ट ह्युस्टन फिल्म फेस्टिभलमा महेश फिल्म ‘हल्कारा’बाट मनोनयनमा परेका हुन् । फेस्टिभलले सार्वजनिक गरेको सूचनामा उत्कृष्ट अभिनेताका लागि महेशले अमेरिका र बेलायतका अभिनेतासँग प्रतिस्पर्धा गर्नेछन् । 

अप्रिल २० देखि २४ सम्म टेक्सासमा चल्ने फेस्टिभलमा ‘हल्कारा’को वल्र्ड प्रिमियर हुन लागेको हो । यो फिल्म २३ तारिखका दिन प्रिमियर हुँदैछ ।  अभिनेता महेशले मनोनयनको खबरले आफूलाई हौसला मिलेको प्रतिक्रिया दिएका छन् । ‘विश्वकै तेस्रो पुरानो फेस्टिभलमा नेपालबाट अभिनेतामा मनोनयन पाउनु साँच्चिकै गर्वलायक कुरा हो भन्ने लागेको छ । के भनौँ, खुसी छु,’उनले इकागजसँग संक्षिप्त प्रतिक्रिया दिँदै भने । 

जीवनमा अकस्मात आइपर्ने घटनालाई मानिसले कसरी झेल्दै जान्छ र कसरी आफैँले आफैँलाई चिन्दै जान्छ भन्ने कथा प्रस्तुत गर्ने फिल्ममा महेश त्रिपाठीको मुख्य भूमिका रहेको छ । ‘चपली हाइट ३’मा भर्खरै देखिएका महेशले यो फिल्ममा बिनिता थापामगर, उमेश तामाङ, पशुपति राई, स्व। दीपक क्षेत्री, विद्या कार्की आदि कलाकारसँग अभिनय गरेका छन् ।

विक्रम सापकोटाले निर्देशन गरेको फिल्मलाई विक्रमसँगै विप्लप प्रतीक र आकाश बरालले लेखेका हुन् । चिन्तन राजभण्डारीको छायांकन रहेको फिल्मलाई कालीपार स्टुडियो र आइसफल प्रडक्सन मिलेर निर्माण गरेका हुन् । 

वल्र्ड फेस्ट ह्युस्टन फिल्म फेस्टिभल अमेरिकाको तेस्रो पुरानो फिल्म फेस्टिभल मानिन्छ । इन्डिपेन्डेन्ट फिल्मलाई प्लेटफर्म दिने उद्देश्यसहित सञ्चालन भइरहेको फेस्टिभलमा यो पटक विश्वका ३० फिचर फिल्म र ६० बढी लघु फिल्म प्रदर्शन हुँदैछन् ।