फेरि दीपेन्द्रको क्याम्पमा सुरक्षा,  ‘के घर के डेरा’मा भित्रिइन् सुरक्षा

काठमाडौँ - निर्देशक दीपेन्द्र के खनालले फेरि एक पटक सुरक्षा पन्तलाई आफ्नो टिममा सामेल गराएका छन् । निर्माता र निर्देशकको रुपमा सुरक्षासँग निरन्तर का मगर्दै आएका दीपेन्द्रले पछिल्लो फिल्म ‘चिसो मान्छे’मा भने लिएका थिएनन् । उनले ‘के घर के डेरा’मा फेरि एक पटक सुरक्षालाई अनुबन्ध गर्दै सहकार्यलाई पाँचौँ फिल्ममा पुर्याउन लागेका हुन् ।

दीपेन्द्रले सबैभन्दा पहिला ‘धनपति’मा सुरक्षालाई खेलाएका थिए । यसपछि उनले निर्माण गरेको ‘घर’मा पनि सुरक्षा मुख्य भूमिकामा थिइन् । यसपछि फेरि उनले निर्देशन गरेको ‘चंगाचेट’मा सुरक्षा अटाएकी थिइन् । यसपछि दीपेन्द्रले निर्देशन गरेको ‘आमा’मा पनि खनालले सुरक्षालाई छुटाएका थिएनन् ।

गत आइतबार मात्रै आमाबाट राष्ट्रपतिको हातबाट उत्कृष्ट अभिनेत्रीको राष्ट्रिय पुरस्कार जितेकी अभिनेत्री पन्तसँग निर्माण टिमले शुक्रबार ‘के घर के डेरा’का लागि औपचारिक रुपमा लिखित सम्झौता गरेको हो ।

सिनेमामा सुरक्षाको प्रवेशसँगै सिनेमामा चार जना मुख्य कलाकार भएका छन् । सिनेमामा यसअघि नै अभिनेता दयाहाङ राई, विपिन कार्की वर्षा राउत र रविन्द्र झा फाइनल भएका थिए । सिनेमा वैशाख २२ गतेबाट छायांकनमा जानेछ । सिनेमाको सम्पूर्ण छायांकन काठमाडौंमा गरिने निर्माण टिमले जनाएको छ ।

शरद श्रेष्ठ, राजीव श्रेष्ठ र किरण महर्जन निर्माता रहेको सिनेमाका कार्यकारी निर्माता युवराज कार्की हुन् । सिंगे लामाको कथा, महेश दवाडीको पटकथा र संवाद, दीर्घ गुरुङको छायांकन रहेको सिनेमालाई यही वर्ष प्रदर्शनमा ल्याउने तयारी निर्माण टिमको छ ।