मेयर बन्न सांसददेखि मन्त्रीहरूको राजीनामा

जनकपुरधाम– नगरपालिकाको मेयर बन्न मधेश प्रदेशका मन्त्रीदेखि प्रदेश सांसदहरुले राजीनामा दिएका छन् । आसन्न स्थानीय तहको निर्वाचनमा मेयर पदको उम्मेदवार बन्न प्रदेश सांसद शेखअब्दूल कलाम आजादले प्रदेश सभा सदस्य पदबाट राजीनामा दिएका छन् ।

तत्कालीन समाजवादी पार्टी रौतहट ४ (२) बाट प्रदेश सभा सदस्य बनेका आजादले रौतहटको गढीमाई नगरपालिकामा मेयर पदको जनता समाजवादी पार्टीबाट उम्मेदवारी दिन राजीनामा दिएका हुन् । शुक्रवार प्रदेश सभाको प्रशासन शाखा प्रमुख जानकी शरण साहलाई आफ्नो राजीनामा पत्र बुझाएका छन् ।
 

इकागजसँग कुरा गर्दै आजादले भने ‘पार्टीले उम्मेदवारी दिनैपर्छ दबाव दिएको कारण आफूले कार्यकाल छदैं राजीनामा दिएको हुँ ।’ उम्मेदवारीपछि निर्वाचनको तयारीमा लाग्नेछु उनले बताए ।

यता प्रदेश सरकारका कानून, न्याय तथा प्रदेशसभा मामिला मन्त्री प्रमोद यादव र प्रदेश सभा सदस्य परमेश्वर साह समेतले मेयरमा चुनाव लड्न राजीनामा दिने तयारीमा रहेका छन् ।

नेकपा एकीकृत समाजवादीको तर्फबाट सिरहा नगरपालिकाको नगरप्रमुखमा उनको एकल नाम सिफारिस भएपछि चुनाव लड्न मन्त्री पदबाट राजीनामा दिने प्रक्रियामा रहेको मन्त्री यादवले बताए । उनले पनि पार्टीको दबाव र मतदाताको चाहना अनुरुप आफूले मेयर पदमा चुनाव लड्न बाध्य भएर राजीनामा दिन लागेको प्रतिक्रिया दिए । 

सिरहा नगरपालिकामा एकीकृत समाजवादी र नेकपा माओवादी केन्द्र गठबन्धन गर्न तयार गर्न लागेका छन् । मेयर समाजवादीलाई उपमेयर माओवादीलाई दिने आन्तरिक सहमति रहेको बताइएको छ ।

मन्त्री यादव २०७४ सालको नेकपा एमालेबाट सिरहा क्षेत्र नम्बर ३ (ख) बाट प्रदेश सभामा निर्वाचित भएका थिए । एमाले विभाजन भएपछि उनी माधव नेपाल नेतृत्वको समाजवादीमा गएका थिए । गत मंसिर ५ गते मधेस प्रदेश सरकारको कानून, न्याय तथा प्रदेशसभा मामिला मन्त्रालयको जिम्मेवारी पार्टीले उनलाई दिएको थियो ।
यसैबीच जनकपुरधाम उपमहानगरपालिकाको मेयर पदमा लोकतान्त्रिक समाजवादी पार्टीबाट चुनाव लड्न प्रदेश सभा सदस्य परमेश्वर साहले समेत राजीनामा दिन लागेका छन् । उनले पार्टीको निर्देशन र कार्यकर्ता तथा मतदाताको स्नेहमा आफूले प्रदेश सभा सदस्यबाट राजीनामा दिन लागेको बताए ।
 

लोसपाबाट उपमहानगरपालिकाका लागि प्रदेश सभा सदस्य साहसहित अमर पजियार, संजय चौधरी, मनोज चौधरी र जानकीराम साहको मेयर पदमा नगरबाट सिफारिस भएको थियो । जानकीराम साह एमालेमा प्रवेश गरिसकेपछि अन्य आकांक्षीहरु पनि टिकटका लागि हानाथाप गरेपनि केन्द्रिय समितिले साहलाई नै उम्मेदवार बनाउने तयारीमा छ ।