रोशी गाउँपालिकाको वडा अध्यक्षमा कांग्रेस नेता लामाको स्वतन्त्र उम्मेदवारी

काभ्रे - रोशी गाउँपालिका वडा नं ३ मा नेपाली कांग्रेस प्रतिनिधि सभा १ को प्रदेश (ख) का कोषाध्यक्ष चन्द्रबहादुर लामाले स्वतन्त्र उम्मेदवारी घोषणा गरेका छन् ।

प्रदेश प्रतिनिधिसमेत रहेका लामा यस अघि स्थानीय तहको चुनावमा सोही वडाबाट चार मतले राप्रपाका वडा अध्यक्ष धनजित लामासँग पराजित भएका थिए ।

लामाले आफुलाई जिल्लामा फरक टिमको भन्दै कांग्रेस जिल्ला सभापति तीर्थ लामा, गशेण लामा, दावा लामासहितले टिकट दिनबाट रोकेको बताए ।

तरुण दल बागमती प्रदेश सदस्यसमेत रहेका लामाले जनताको जनमतको कदर नगरी पूर्वग्राही ढंगबाट प्यानल हेरेर टिकट वितरण गरेपछि यसको विरुद्ध आफूले स्वतन्त्र उम्मेदवारी घोषणा गरेको बताएका हुन् ।
 
पार्टीमा पुँजीपति हावी हुनुका साथै गुटलाई प्रोत्साहन गरी क्रियाशिल कार्यकर्तालाई पन्छाउने तत्वहरु हावी भएकोले जनताको इच्छा बमोजिम उम्मेदवारी घोषणा गरेको लामाले बताए ।
 
जिल्लामा तीर्थ लामा समूहले नेपाली कांग्रेसमा क्रियाशिल रहेको आधार भन्दा पनि आफु निकट रहेका व्यक्तिहरुलाई स्थानीय तहको निर्वाचनको उम्मेदवार बनाउने गरको उनको आरोप छ ।

लामाले भोलि भोलि (सोमबार) स्वतन्त्र उम्मेदवारको रुपमा मनोनयन दर्ता गर्ने बताएका छन्  ।