३७ स्थानीय तहले पेश गरेनन् बजेट

काठमाडौँ  : ३७ स्थानीय तहले अझै संघीय मामिला तथा सामान्य प्रशासन मन्त्रालयमा आर्थिक वर्ष २०७७/७८ को बजेट पेश गरेका छैनन् । मन्त्रालयले पटक-पटक ताकेता गर्दा पनि अझै ३७ स्थानीय तहले बजेट पेश नगरेको मन्त्रालयका प्रवक्ता वसन्त अधिकारीले जानकारी दिए । गत असारमा बजेट पास गरेका स्थानीय तहले अनिवार्यरूपमा बजेट मन्त्रालयमा पेश गर्नुपर्ने कानुनी व्यवस्था छ ।
 
विवरण पेश नगर्ने सबैभन्दा धेरै प्रदेश नं २ का स्थानीय तह छन् । प्रदेश नं २ मा १ सय ३६ स्थानीय तहमध्ये १ सय ४ वटाले मात्र विवरण पेश गरेका छन् भने ३२ स्थानीय तहले अझै गरेका छैनन् ।
 
यस्तै बजेट पेश नगर्नेमा प्रदेश नं १ का दुई, प्रदेश नं २ का ३२, वाग्मती प्रदेशमा दुई र सुदूरपश्‍चिम प्रदेशको एक स्थानीय तह छन् । 

प्रदेश नं १ का भोटखोला गाउँपालिका सङ्खुवासभा र मेन्छयायेम गाउँपालिका तेह्रथुम छन् । वाग्मती प्रदेशको लिखु तामाकोशी गाउँपालिका रामेछाप र आमाछोदिङमो गाउँपालिका रसुवा, सुदूरपश्‍चिम प्रदेशको बूढीगङ्गा नगरपालिका बाजुरा रहेका छन् । कानूनअनुसार सबै स्थानीय तहले गत असार १० गतेभित्र बजेट पारित गरेका थिए । (रासस)