एमाले बैठक : ओलीको संसदीय दल, खनाल-नेपाल समूहको केन्द्रीय समिति बस्दै

काठमाडौँ : नेकपा एमालेका दुवै पक्षका छुट्टाछुट्टै बैठक आज बस्दैछ । झलनाथ खनाल-माधव नेपाल समूहको केन्द्रीय कमिटी बैठक आज कलंकीमा बोलाइएको छ । कलंकीको एक पार्टी प्यालेसमा बोलाइएको बैठकमा पछिल्लो राजनीतिक घटनाक्रम र प्रधानमन्त्री तथा एमाले अध्यक्ष केपी शर्मा ओलीले सोधेको स्पष्टीकरणको जवाफलगायतका विषयमा छलफल हुनेछ । खनाल-नेपाल समूहले स्पष्टिकरण दिइसकेकाले अब कसरी अगाडि बढ्‍ने भन्‍ने विषयमा पनि छलफल हुने बताइएको छ ।

ओली समूहले कारवाही गर्ने चेतावनी दिइरहेका बेला नेपाल समूह अब कसरी अगाडि बढ्छ ? भन्‍ने चासोका साथ यो बैठकलाई हेरिएको छ । यस्तै एमाले अध्यक्ष ओलीले आज संसदीय दलको बैठक बोलाएका छन् ।

दिउँसो एक बजे बालुवाटारमा संसदीय दलको बैठक बोलाइएको एमालेका प्रमुख सचेतक विशाल भट्टराईले जानकारी दिए । संसदलाई कसरी प्रभावकारी बनाउने, विकास निर्माणका कार्यक्रमलाई कसरी अगाडि बढाउने र एमालेको संसदीय दललाई कसरी एक ढिक्का बनाउने भन्‍ने विषयमा छलफल हुने भट्टराईले बताए । उनका अनुसार आजको बैठकले पार्टीभित्रको आन्तरिक राजनीतिसँगै विकास निर्माणका काममा सांसदलाई केन्द्रित हुन प्रधानमन्त्री ओलीले निर्देशन दिने तयारी छ ।