कैलालीमा केरा पकाउने उद्योग सञ्‍चालन

धनगढी : कैलालीमा साढे ३ करोडको लागतमा केरा पकाउने उद्योग सञ्‍‍चालनमा आएको छ । टीकापुर-२ बन्दीपुरमा केरा पकाउने च्याम्बर उद्योग सञ्‍चालनमा आएको हो । उद्योगमा एक पटकमा ३०/३० टनका ५ वटा चेम्बरमार्फत केरा पकाउन सकिने प्रबन्ध निर्देशक वीरेन्द्र ढुंगानाले जानकारी दिए । 

च्याम्बर निर्माण गर्न रानीजमरा कुलरिया सिँचाइ आयोजना कृषि कार्यक्रम कार्यान्वयन एकाइ टीकापुरले एक करोड ९० लाख अनुदान सहयोग गरेको छ भने उद्योग निर्माण कम्पनी कर्णाली कृषि सेवा प्रालिले एक करोड ६६ लाख लगानी गरेको छ । 

‘केरा पकाउन विषादीको प्रयोग हुने गरेको थियो अब उपभोक्ताले विषादी रहित च्याम्बरमा पकाएको स्वस्थ केरा खान पाउने भएका छन्,’ उद्योगका निर्देशक ढुंगानाले भने । उनले च्याम्बरमा १६ देखि २३ डिग्री सेल्सियस तापक्रममा चार दिनमा केरा पकाउने सकिने बताए । 

आँप, गोलभेडा र मेवा पनि पकाउनुका साथै उत्पादित तरकारी भण्डारण गर्न पनि सकिने भएकाले च्याम्बरलाई बहुउद्देश्यीय रुपमा प्रयोग गर्ने योजना बनाएको उनले बताए । रानी जमरा कुलरिया सिँचाई आयोजना कृषितर्फका प्रमुख भरत कँडेल च्याम्बर सञ्‍चालनपछि किसानलाई मात्र नभइ उपभोक्ताको स्वास्थ्यका लागि फाइदाजनक हुने बताए ।