काठमाडौँ महानगरमा कुल ८२६ उम्मेदवारको नाम दर्ता, सबैभन्दा धेरै वडा १५ मा

फाइल तस्बिर

काठमाडौँ- वैशाख ३० गते हुने स्थानीय निर्वाचनका लागि काठमाडौँ महानगरपालिकाको वडा १५ मा ३३ जना उम्मेदवारको नाम दर्ता भएको छ । महानगरको मुख्य निर्वाचन अधिकृतको कार्यालयका अनुसार वडा १५ मा सबैभन्दा बढी उम्मेदवारको मनोनयन दर्ता भएको हो । कार्यालयले ८ सय २६ जना प्रत्याशीको नाम अन्तिम नामावलीमा प्रकाशित गरेको छ ।

त्यसैगरी, वडा ७ र ३१ मा ३१/३१ जना उम्मेदवार छन् । वडा १७ र २९ मा २८/२८ जना उम्मेदवार प्रतिस्पर्धी छन् । ठूला वडा ४, १०, १४ र २६ मा २६/२६ जना प्रतिस्पर्धी छन् ।

सबैभन्दा कम वडा १३ मा १५ र २३ मा १६ जना उम्मेदवार प्रतिस्पर्धी छन् । तेस्रोमा २१ र २२ वडामा २२/२२ जना उम्मेदवार छन् । १९ र २८ मा १९/१९ जना उम्मेदवार छन् । बाँकी वडामा १९ जनाभन्दा धेरै र २६ जनाभन्दा कम उम्मेदवार छन् । 

मुख्य निर्वाचन अधिकृतको कार्यालयले महानगरपालिकामा मात्र ८ सय २६ जना प्रत्याशीको नाम अन्तिम नामावलीमा प्रकाशित गरेको छ ।

स्थानीय तह निर्वाचन निर्देशिका, २०७८ अनुसार काठमाडौँ महानगरको प्रमुख पदमा राष्ट्रिय मान्यता प्राप्त दलबाट ३ राष्ट्रिय दलका रुपमा मान्यता प्राप्त नगरेका दलबाट १७ र स्वतन्त्रबाट ३५ गरी ५५ जनाको उम्मेदवारी परेको छ ।

उपप्रमुखमा राष्ट्रिय मान्यता प्राप्त दलबाट २ जना, राष्ट्रिय मान्यता प्राप्त नगरेका दलबाट ९ जना र स्वतन्त्र १९ गरी ३० जनाको उम्मेदवारी परेको छ । एक वडामा अध्यक्ष, सदस्य, महिला सदस्य र दलित महिला सदस्य गरी पाँच पद हुन्छन् । महानगरका ३२ वडामा १६० पद छन् । ती पदमा ७४१ जनाको उम्मेदवारी परेको छ ।

राष्ट्रिय मान्यता प्राप्त दलबाट ५ सय ६, राष्ट्रिय दलको मान्यता प्राप्त नगरेका दलबाट १ सय ७७ र ५८ जनाको स्वतन्त्र उम्मेदवारी रहेको सहायक निर्वाचन अधिकृत प्रेमप्रसाद पौडेलले जानकारी दिए ।

पौडेलका अनुसार अध्यक्ष पदमा २१० जनाको, सदस्य पदमा २९८ जनाको, महिला सदस्य पदमा १४५ जनाको र दलित महिला सदस्य पदमा ८८ जनाको उम्मेदवारी परेको छ । वडा २४ र २५ वडामा दलित महिला सदस्य पदमा कुनै पनि उम्मेदवारी परेन ।

स्थानीय तह निर्वाचन निर्देशिका, २०७८ को अनुसूची ५ मा राष्ट्रिय मान्यता प्राप्त राजनीतिक दल सम्बन्धी र अनुसूची २६ मा राष्ट्रिय मान्यता प्राप्त नभएका दल सम्बन्धी व्यवस्था छ । यसै गरी निर्देशिकाको दफा ५७ को उपदफा ६ मा स्वतन्त्र उम्मेदवार सम्बन्धी व्यवस्था छ ।