मंगलबार एकै दिन करिब ६० हजारले छाडे उपत्यका

फाइल तस्बिर

काठमाडौँ - स्थानीय तहको चुनाव आउन २ दिन बाँकी रहँदा राजधानी काठमाडौंबाट घर फर्किनेहरूको घुइँचो लागेको छ । विभिन्न कामले उपत्यकामा रहेका नागरिक स्थानीय तह निर्वाचनका लागि जिल्लामा फर्कने क्रम बढेको हो ।

काठमाडौँ उपत्यका ट्राफिक प्रहरी कार्यालयअनुसार विगत केही दिनदेखि उपत्यकाबाट जिल्ला फर्कने मानिस बढेका छन् । कार्यालयका अनुसार अहिले दैनिक काठमाडौँ आउनेभन्दा बाहिरिने बढिरहेका छन् ।

यतिबेला काठमाडौंको कोटेश्वर, कलंकी, बालाजु, बल्खु क्षेत्रमा घर फर्किनेहरूको भीड लागेको छ । गाउँ फर्किनेहरूको संख्या धेरै भएकाले सवारी साधनहरू खचाखच भरिएका छन् । 

मंगलबार मात्र करिब ६० हजार गाउँ-गाउँका यात्रुले काठमाडौँ उपत्यका छोडेका छन् । काठमाडौँ उपत्यका ट्राफिक प्रहरी कार्यालयका प्रवक्ता सन्जिव शर्मा दासका अनुसार हिजो मात्र ५९ हजार ८१ यात्रुले उपत्यका छाडेका हुन् ।

सानाठूला सवारीसाधन ९ हजार ९५६ उपत्यकाबाट बाहिरिएका छन् । महाशाखाका अनुसार मंगलबार ८ हजार २६९ सानाठूला सवारीसाधन उपत्यका भित्रिएका छन् । त्यसैगरी ४२ हजार ८३२ यात्रुको प्रवेश भएको छ ।

यो क्रम वैशाख लागेदेखि नै सुरु भएको र हाल झनै बढिरहेको छ । कार्यालयका अनुसार सोमबारको तथ्याङ्क हेर्दा उपत्यकाबाट ७ हजार ९११ सवारीमार्फत ५५ हजार ७४६ यात्रु बाहिरिएका छन् । उपत्यका भित्रिने सङ्ख्या भने ४२ हजार ५४४ छन् ।

अघिपछि दैनिक भित्रिने र बाहिरिने मानिसको सङ्ख्या बराबरजस्तै हुने गरेकामा अहिले भने १० देखि १५ हजार बढी बाहिरिएका छन् । अबको दुई दिन यो क्रम अझै बढ्ने छ ।

कतिपय नागरिक निजी गाडी तथा सार्वजनिक सवारी साधनमा जिल्ला गइरहेका छन् भने कतिपय नागरिक उम्मेदवार र राजनीतिक दलका झण्डा र चुनाव चिह्नसहित रिजर्व गाडीमा गइरहेका पनि देखिएको छ ।