असुरक्षित बन्दै वन्यजन्तु

फाइल तस्वीर

काठमाडाैं : कार्तिक ६ गते गैँडाको खागको अवैध रुपमा कारोबार गरेको आरोपमा एक व्यक्ति पक्राउ परे । अपराध महाशाखाबाट खटिएको टोलीले सुनसरी, इनरुवाका राजेन्द्र रिजाल (४९) लाई पक्राउ गरेको थियोे । 

काठमाडौँ, चुच्चेपाटी पासाङ ल्यामु चोकबाट रिजाल (४९) लाई प्रहरीले पक्राउ गरेको थियो । रिजाल पेशाले शिक्षक हुन् । रिमाललाई आवश्यक अनुसन्धानका लागि अहिले जिल्ला वन कार्यालय हात्तीसार पठाइएको छ ।

०००
काठमाडौँ, दरबारमार्गमा प्रहरीले केही व्यक्तिहरुलाई कस्तुरीको विनासहित समात्यो । प्रतिबन्धित कस्तुरीको विना अवैध रुपमा बिक्री वितरण गर्नका लागि लुकाएर राखेको सूचना प्रहरीले पाएपछि दुईजनालाई पक्राउ गरेको थियो । 

कार्तिक ६ गते दिउँसो २ बजे दरबारमार्ग सालिकचोकबाट उनीहरु पक्राउ परेका थिए । पक्राउ पर्नेमा काभ्रे चिसापानीका पासाङ लामा (३९) र राम कुमार लामा (३६) हुन् । कस्तुरीको विनासहित उनीहरुलाई महानगरीय अपराध महाशाखाबाट खटिएको अनुसन्धान टोलीले पक्राउ गरेको थियो । 

०००
कछुवाको अवैध ओसारपसार तथा विक्रीवितरण भैरहेको भन्ने सूचनाको आधारमा कार्तिक १६ गते  पाँच जना समातिए । महानगरीय अपराध महाशखाबाट खटिएको प्रहरी टोलीले उक्त कार्यमा संलग्न रहेका व्यक्तिहरुलाई पक्राउ गरेको थियो ।

रामेछाप, हिमगंगाका नैन बहादुर आले मगर (२९), गोरखा, बारपाकका सुजन उपरकोटी (२४), रामेछाप, दोरम्बाका छेवाङ् लामा (३३), राजकुमार घिसिङ (२६) र दावा लामा (२९) लाई प्रहरीले भक्तपुर, सुर्यबिनायकबाट जिउँदो कछुवासहित पक्राउ गरेको थियो ।

०००
जंगली बँदेल मारेको अभियोगमा कार्तिक १७ गते चन्द्रागिरी नगरपालिका–४ सेतेपहराबाट पाँच जनालाई प्रहरीले पक्राउ ग-यो । मकवानपुर थाहा नगरपालिका–९ चित्लाङ बस्ने रामदास देउला (५०), सरोज देउला (२१), भिमदास पोडे (४१), रामचरण पोडे (३६) र राजेश देउला (२२) गरी पाँच जना पक्राउ परेका थिए ।

चन्द्रागिरी नगरपालिका– ४ सेतेपहरा थानकोटस्थित जंगलमा जंगली बँदेल मारी ओसारपासर गरिरहेको अवस्थामा उनीहरू पक्राउ परेका थिए । महानगरीय प्रहरी वृत्त थानकोटबाट खटिएको प्रहरीले उनीहरूलाई पक्राउ गरेको थियो । मृत अवस्थामा रहेको जंगली बँदेल बोकी लैजान लागेको अवस्थामा फेला पारेको प्रहरीले जनाएको थियो । 

बन्यजन्तुको कारोबारलाई राष्ट्रिय निकुञ्ज तथा वन्यजन्तु संरक्षण ऐन २०२९ तथा साइटिस महासन्धी १९७५ विरुद्धको अपराध मानिन्छ । यस्तो अपराध गर्नेलाई ५ वर्ष देखि १५ वर्षसम्म कैद र ५० हजारदेखि १ लाखसम्म जरिवाना वा दुवै सजाय हुने व्यवस्था छ ।

महानगरीय अपराध महाशाखाका एसपी इश्वर कार्कीले लगातार वन्यजन्तुहरू तस्करीको खबर आउनु दुखद् रहेको बताए । ‘वन्यजन्तु संरक्षणका लागि हामीले सक्दो प्रयास गरिरहेका छाैं,’ उनले भने, ‘यस्ता अवैध कार्यमा लाग्नेलाई हामीले कानुनको दायरामा ल्याएरहेका छौँ । हाम्रो देश मात्र नभएर धेरै देशहरु यसको विरुद्धमा छन् । यो गर्नुहुँदैन भनेर विभिन्न सन्धीहरू नै भएका छन् ।’ 

धेरैजसो व्यक्तिहरूले वन्यजन्तु तस्करी गरेर औषधिजन्य रुपमा प्रयोग गर्ने गरेको पाइएको उनले बताए । कसैले भने शोखको रुपमा समेत प्रयोग गर्ने गरेको अनुशन्धानले देखाएको छ । अन्तराष्ट्रिय बजारमा पु-याउनको लागि पनि धेरैले यस्ता कामहरु गर्ने गरेको एसपी कार्कीले बताए । ‘यस्ता केसहरुमा मानिसलाई लोभले गाइड गरेको देखिन्छ,’ उनले भने, ‘छिटो र धेरै कमाउ भन्ने सोचले मानिसहरु यस्ता क्रियाकलाप गर्छन् ।’