मुम्बई :  आमिर खानको ‘पिके’ नेसनल फिल्म आर्काइभ अफ इन्डियामा राखिएको छ । फिल्मका निर्देशक राजकुमार हिरानीले मंगलबार फिल्मको रिल आर्काइभलाई हस्तान्तरण गरेका थिए । 

‘पिके’ भारतमा सेल्युलोइडमा खिचिएको अन्तिम फिल्ममध्ये एक हो । २०१३ देखि भारत पूर्णतया डिजिटल फम्र्याटमा गएको हो । मंगलबार हिरानीले फिल्मको नेगेटिभसँगै ३ सय रिल पनि आर्काइभका अध्यक्ष प्रकाश मकदमलाई हस्तान्तरण गरेका थिए ।

हिरानीको निर्देशनसँगै लेखन र सम्पादन पनि रहेको फिल्मलाई विधुविनोद चोपडाले निर्माण गरेका हुन् । झुक्किएर पृथ्वीमा छुटेको एलियनको माध्यमबाट धर्म र राजीतिलाई प्रहार गर्ने यो फिल्ममा आमिर खानले एलियनको भूमिका निर्वाह गरेका छन् । 

हिरानी निर्देशित अघिल्ला फिल्म पनि आर्काइभको संरक्षणमा छन् । हिरानी निर्देशित ‘मुन्नाभाइ एमबीबीएस’, ‘लग रहो मुन्नाभाइ’, ‘थ्री इडियट्स’ पनि आर्काइभमा संग्रहित छन् । 

फिल्ममा सञ्जय दत्त, अनुष्का शर्मा र दिवंगत अभिनेता सुशान्तसिंह राजपुतको पनि अभिनय रहेको छ । हिरानी पछिल्लो समय शाहरुख खानलाई लिएर फिल्म बनाउने तयारी गरिरहेका छन् । तर, यो फिल्मको विस्तुत जानकारी अहिलेसम्म बाहिर आइसकेको भने छैन ।