काठमाडौँ– राष्ट्रिय स्वतन्त्र पार्टीकी सांसद इन्दिरा राना मगर उपसभामुखमा निर्वाचित भएकी छन् । शनिबार भएको निर्वाचनमा सांसद मगर विजयी भएकी हुन् ।

शनिबार प्रतिनिधि सभाको बैठकमा उपस्थित २६४ सांसदमध्ये मगरलाई १६६ सांसदले मत दिएका छन् । उनकी प्रतिस्पर्धीका रूपमा उम्मेदवारी दिएकी कांग्रेसकी मुक्ताकुमारी यादवले भने ९७ मत मात्रै पाइन् । एक सांसद भने तटस्थ बसेका छन् ।

सत्तारूढ दलहरूको साझा उम्मेदवार रहेकी मगरलाई रास्वपाकी सांसद सोविता गौतमले उपसभामुख पदका लागि प्रस्ताव गरेकी थिइन् ।

उक्त प्रस्तावको समर्थन नेकपा एमालेका सांसद कृष्णगोपाल श्रेष्ठ, माओवादी केन्द्रकी सांसद नारायणी शर्मा र राष्ट्रिय प्रजातन्त्र पार्टीका अध्यक्ष राजेन्द्रप्रसाद लिङ्देनले गरेका थिए । 

नेपाली कांग्रेसकी सांसद यादवको उम्मेदवारीको प्रस्तावकमा कांग्रेस सह–महामन्त्री बद्रीप्रसाद पाण्डे थिए भने समर्थकमा एकीकृत समाजवादीका सांसद मेटमणी चौधरी र लोसपाका सांसद सर्वेन्द्रनाथ शुक्ला थिए ।