प्रचण्ड र ओलीको त्यो प्रस्ताव : जब वामदेवले अस्वीकार गरे

फाइल तस्बिर

काठमाडौँ- नेकपा एकता राष्ट्रिय अभियानका संयोजक वामदेव गौतमले नेपालमा कम्युनिस्ट पार्टीलाई एकतामा ल्याउनका लागि आफू कुनै पार्टीमा नगएको बताएका छन् । शनिबार नेकपा एकता राष्ट्रिय अभियानको कार्यक्रममा बोल्दै गौतमले यस्तो बताएका हुन् ।

नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीले पार्टीमा आउन प्रस्ताव गर्दा नेपालमा कम्युनिस्ट पार्टीहरूलाई एकजुट गराउने भन्दै माओवादी र एमाले प्रवेश नगरेको दाबी गरेका हुन् । 'ओली र प्रचण्डले पार्टीमा बोलाए म आउँदिन भने । म त्यतिबेला जान हुने थिएन । किन कि म एमाले र माओवादीमा प्रवेश गरेको भए कम्युनिस्ट एकता गर्न को लाग्छ ? मैले उहाँहरूलाई  पार्टी एकतामा सधैँ लाग्छु भन्‍ने जवाफ दिएँ' गौतमले भने ।

उनले कम्युनिस्ट एकता गराउन सक्‍ने आफू जतिको उपयुक्त पात्र अरु नभएको बताएका छन् । उनले नेपालमा कम्युनिस्ट एकताका लागि आफू जस्तो सुकै त्याग गर्न पनि सक्ने बताए ।

त्यस्तै उनले आफू गुटमा नलागेको भए तत्कालिन नेकपा पार्टी नफुट्‌ने दाबी गरे । गौतमले आफुलाई पार्टी फुट्‌ने कल्पनासमेत नभएर गुटमा लागेको बताए ।

'मेरै कारणले तत्कालिन नेकपा पार्टी फुट्यो भन्ने आरोप लगाए । म गुटमा नलागेको भए पार्टी फुट्ने थिएन' गौतमले भने 'मैले आत्मआलोचना गरेको छु । मलाई कल्पना पनि थिएन पार्टी फुट्‌छ भनेर ।'

पुष्पकमल दाहाल प्रचण्डले केपी ओलीविरुद्ध अविश्वासको प्रस्ताव लैजाने भएपछि आफुले प्रचण्डको गुट पनि छाडेको उनले बताए ।