मलेसिया र थाइल्यान्डमा फुटबल खेल्ने एनआरटीको विदाइ

काठमाडौँ - मलेसिया र थाइल्याण्डमा फुटबल खेल्न जान लागेको सहिद स्मारक 'ए' डिभिजन क्लब न्युरोड टिम (एनआरटी) को सोमबार विदाइ गरिएको छ । एनआरटीका अध्यक्ष सुन्दरनरसिंह जोशी लगायतले ३० सदस्यीय टोलीको विदाइ गरेको हो ।

मलेसियामा एनआरटीले पेनाङमा हुने टुवान याङ टेरुतमा (टीवाईटी) कप फुटबल प्रतियोगिता खेल्नेछ । उक्त प्रतियोगितामा एनआरटीले मलेसियाको सुपर लिग क्लब पेनाङ एफसी र इन्डोनेसियाको  लिग टु क्लब कारो एफसीविरुद्ध खेल्ने  तालिका रहेको छ ।

एनआरटीले जुन ३० मा कारो एफसी र जुलाई २ मा पेनाङ एफसीसँग खेल्ने तालिका रहेको छ । पेनाङ सिटी रंगशालामा हुने प्रतियोगिताको विजेताले १० हजार मलेसियन रिङगेट तथा उपविजेताले ५ हजार मलेसियन रिङगेट प्राप्त गर्नेछन् ।

मलेसियापछि एनआरटी थाईल्यान्ड जानेछ र त्यहाँ उसले ३ मैत्रीपूर्ण खेल खेल्ने तालिका रहेको छ ।