‘कोही नेपाली नागरिक पहिचान बोक्ने नागरिकताबाट बञ्‍चित नहोस्’

काठमाडौँ : सांसद शशी श्रेष्ठले पहिचान बोक्ने नागरिकताबाट कोही नेपाली बञ्चित हुन नहुने बताएकी छन् ।  प्रतिनिधि सभाको सोमबारको बैठकमा बोल्दै श्रेष्ठले नागरिकता विद्येयक पास नगरेको भन्दै सरकारप्रति आक्रोश पोखेकी हुन् । 

‘हरेक नागरिकको पहिचान बोक्ने नागरिकता प्राप्त बाट बञ्‍चित नहोस् । असार ८ मा विधेयक पारित गरिएको थियो,’ उनले भनिन्, ‘१० महिना लाग्दा पनि विधेयक पास नहुँदा शिक्षा, स्वास्थ्य रोजगार जस्ता संविधान प्रदत्त अधिकारबाट युवा बञ्चित भएका छन् । बैंक खातामा तलब राख्नुपर्ने, अनिवार्य गर्नुपर्ने भएकाले जागिर खानबाट बञ्‍चित भइरहेका छन् । घाम जत्तिकै छर्लंग भएको विषय हो । संविधासभाको पुनर्स्थापनाको विषय चलिरहेको समयमा यो विषय ओझेलमा पर्‍यो ।’ 

 सरकारले संसद्लाई बिजनेश नदिएको उनको आरोप छ । ‘गत पुस ५ गते स्वेच्छाचारी ढंगबाट संसद्‍ विघटन भयो । संसद्‍ पुनर्स्थापना भएपछि सामान्य प्रस्ताव प्रस्तुत गर्ने शोक प्रस्ताव पारित गर्ने मात्रै काम रह्यो,’ उनले भनिन्, ‘सरकारले विजनेश दिइरहेको छैन । ५५ वटा विधेयक छन् । अध्यादेश पनि छन् । अध्यादेश सम्बन्धमा केही विमति भए मुलुक अध्यादेशबाट चलाउने होइन । ल्याउन सकिन्छ । नसकिने होइन । हाम्रो मुलुकमा थुप्रै समस्या छन् । दलहरू एक ढिक्का भएर अघि बढ्दा मुलुकले जितेको छ । स्वविवेकले चल्न नसकेको होकी भन्‍ने आइरहेको छ ।’