सिटी भर्सेस म्युनिखः डेब्यु खेलमै हालान्डको निर्णायक गोल

काठमाडौँ – प्रि-सिजन मैत्रीपूर्ण फुटबल खेलमा म्यानचेस्टर सिटीले बार्यन म्युनिखलाई पराजित गरेको हो । अमेरिकाको लाम्वियु फिल्डमा आइतबार बिहान भएको खेलमा इंग्लिस क्लब सिटीले जर्मन क्लब म्युनिखलाई १-० गोलअन्तरले पराजित गरेको हो ।

४५ मिनेट ढिला सुरु भएको खेलमा सिटीलाई जित दिलाउन एकमात्र निर्णायक गोल अर्लिङ हालान्डले गरे । खेलको १२ औँ मिनेटमा नर्वेजियन स्ट्राइकर हालान्डले गरेको एकमात्र गोल सिटीको जितका लागि पर्याप्त रह्यो ।

हालान्डले सिटीका लागि डेब्यु खेलमै ८० हजार दर्शकमाझ गोल गर्न सफल भएका हुन् । यसअघि सिटीले अमेरिकामै क्लब अमेरिकालाई २-१ ले पराजित गर्दा हालान्डले उक्त खेल गुमाएका थिए ।

सिटी र म्युनिख प्रि-सिजन टुरका लागि अमेरिका पुगेका हुन् ।