शिक्षकमा कोभिड देखिएपछि बुटवलस्थित कालिका मानविज्ञान माविको पठनपाठन बन्द

बुटवल : शिक्षकहरूमा कोरोना संक्रमण देखिएपछि बुटवलस्थित कालिका मानविज्ञान माविको पठनपाठन बन्द भएको छ । गतसाता पश्चिम नेपालका विभिन्न स्थानको शैक्षिक भ्रमण गरी फर्किएका विद्यालयका शिक्षकहरूमा कोरोना संक्रमण देखिएपछि विद्यालय बन्द गरिएको हो ।

बुटवल उपमहानगरपालिकाको स्वास्थ्य तथा शिक्षा महाशाखाका प्रमुख मित्रमणी खनालले बैशाख २ गतेसम्मको लागि विद्यालयको पठनपाठन बन्द गरिएको जानकारी दिए । खनालले भ्रमणमा गएका शिक्षकहरूमध्ये ७ जनामा कोरोना संक्रमण देखिएपछि गत शुक्रबारदेखि नै विद्यालय बन्द गरिएको जानकारी दिए। विद्यालयबाट प्रधानाध्यापकसहित करिब १ सय जना शिक्षकहरू शैक्षिक भ्रमणको लागि गएका थिए । तीमध्ये ७ जनामा कोरोना संक्रमण पुष्टि भएको र अरु शिक्षकहरू पनि होम आइसोलेसनमा रहेको उपमहानगरपालिकाले जनाएको छ ।

यस्तै बुटवल १२ ढवाहस्थित ग्लोबल पिस पार्कमा रहेका ब्रम्हाकुमारीहरुमा पनि कोरोना संक्रमण देखिएको छ । पिस पार्कमा रहेका ४ जना ब्रम्हाकुमारीमा कोरोना संक्रमण देखिएपछि पिस पार्क समेत बन्द गरिएको हो । 

पछिल्लो साता रुपन्देही लगायतका क्षेत्रमा कोरोना संक्रमितहरुको संख्या बढ्दै गएको छ । सोमबार मात्रै बुटवल कोरोना विशेष आइसोलेसन अस्पतालमा भर्ना भएका ३ जना संक्रमितको मृत्यु भएको छ । जिल्ला स्वास्थ्य कार्यालयका अनुसार हालसम्म जिल्लामा मृत्यु हुने संक्रमितको संख्या १ सय ५७ पुगेको छ । त्यस्तै सोमबार थप ३० जनामा कोरोना संक्रमण पुष्टि भएको छ ।