संसद्‍‍विरुद्ध ठूलो घेराबन्दी भइरहेको छ : सभामुख सापकोटा

फाइल तस्बिर

काठमाडौँ ।  सभामुख सापकोटा सभामुख अग्निप्रसाद सापकोटाले संघीय संसद्‍‍विरुद्ध ठूलो घेराबन्दी भइरहेको आरोप लगाएका छन् ।  आइतबार काठमाडौँमा नेपाल पत्रकार महासंघको विदाई तथा पदभार कार्यक्रममा सभामुख सापकोटाले आफू सभामुखका रूपमा राष्ट्रिय हितको पक्षमा उभिएदेखि नै यस्तो घेराबन्दी भएको बताएका हुन् । 

संसदलाई जनमुखी बनाउन थालेपछि घेराबन्दी गरिएको र विभिन्न अभिव्यक्ति आउने गरेको भन्दै उनले यसलाई कुनै व्यक्ति वा अधिकारीबीचको टक्करको रुपमा लिन नहुने र यो प्रवृत्तिबीचको टक्कर भएको बताए । सापकोटाले अहिलेको टक्कार संविधानको रक्षा गर्ने कुरासँग पनि सम्बन्धित रहेको जिकिर गरे ।

सभामुख सापकोटाले आफूले देश र जनताको हितविपरीत कुनै काम नगर्ने र आफूलाई  जनताको पक्षमा काम गर्न कसैले रोक्न नसक्ने उल्लेख गरे । उनले देश र जनताको काम गर्न रोक्न जस्तोसुकै दबाब र प्रभाव आए पनि नरोकिने बताए । उनले कानुन निर्माणमा संसद्को महत्वपूर्ण भूमिका रहने भएकाले त्यसलाई प्रभावकारी ढंगले चलाउन प्रयास गर्ने बताए ।