बागमतीका प्रदेश प्रमुखद्वारा दुई अध्यादेश जारी

मकवानपुर- बागमती प्रदेश प्रमुख यादवचन्द्र शर्माले दुई वटा अध्यादेश जारी गरेका छन् ।

मंसिर ४ गते हुने प्रतिनिधिसभा र प्रदेशसभा चुनावको मुखमा आफ्ना स्वार्थका अध्यादेश जारी गर्ने क्रम अझै नरोकिएको भन्दै यसको आलोचना गरिएको छ । 

संसद्‌ बन्द गरेर अध्यादेशमार्फत सरकार चलाउँदै आएको बागमती प्रदेश सरकारले आफ्ना स्वार्थका अध्यादेशहरू बिगतमा पनि जारी गरेको थियो ।

आम जनताको हितभन्दा पनि प्रदेशका मन्त्री र कर्मचारीका स्वार्थ पुरा गर्ने अध्यादेश ल्याउँदै आएको बागमती प्रदेश सरकारले सिफारिस गरेको दुई वटा अध्यादेश प्रदेश प्रमुख यादवचन्द्र शर्माले प्रमाणिकरण गरेर जारी गरेका हुन् । यो जानकारी गोप्य राख्न खोजे पनि भोलिपल्ट सार्वजनिक भएको छ ।

प्रदेश सरकारले चुनावको मुखका प्रदेश कृषि विकास सम्बन्धमा व्यवस्था गर्न बनेको अध्यादेश र प्रदेश हस्तकला ग्राम स्थापना तथा सञ्चालनको सम्बन्धमा व्यवस्था गर्न बनेको अध्यादेश प्रदेश प्रमुखले जारी गरेका हुन् ।

चुनावको मिति घोषणा गरेर काम चलाउन सरकारको रुपमा परिणत भएको यो सरकारले चुनाव नजिकिँदासमेत अध्यादेश जारी गर्ने काम रोकेको छैन । संसद्‌ बन्द गरेर ल्याएका सबैजसो अध्यादेश आफ्ना स्वार्थ अनुकुलका अध्यादेश मात्र जारी गरिएको छ । प्रतिपक्षले यसको विरोध गरेको छ ।