राप्रपा कमजोर छैन प्रदेश र प्रतिनिधि सभा दुवै जित्छौं : न्यौपाने

मकवानपुर- आसन्न प्रतिनिधि तथा प्रदेश सभा निर्वाचनमा राष्ट्रिय प्रजातन्त्र पार्टी(राप्रपा) कमजाेर नभएकाे मकवानपुर क्षेत्र नम्बर १ प्रदेश सभा (ख)का उम्मेदवार गुञ्जनबहादुर न्यौपानेले बताएका छन् । 'राप्रपा कमजोर छैन प्रदेश र प्रतिनिधि सभा दुवै जित्छौं,' हेटौंडा उपमहानगरपालिकामा भएकाे चुनावी प्रचारप्रसारमा न्यौपानेले भने, ‘मकवानपुरे जनताको आशा र भराेसा भएकाे पार्टी राप्रपा हाे । जनताका इच्छा र आकाङ्क्षा पूरा गर्न राप्रपा प्रतिबद्व छ ।’

‘न भ्रष्टाचार गरिन्छ न भ्रष्टाचार गर्न दिइन्छ,’ भन्दै न्याैपानेले भने, ‘सके प्रदेश खारेज गरेर स्थानीय तह र केन्द्रीय सरकार बलियो र लोककल्याणकारी बनाइन्छ । नसके जनताको रगत, पसिनाको राजस्व र करको दुरुपयोगमा खबरदारी गरिन्छ ।’

आफ्नाे पार्टीकाे स्पष्ट विचार रहेकाले लप्पन छप्पन नभएकाे उनले बताए । उनले सरकार र व्यवस्थाको नाममा लुटधन्दा मच्चाउन र परिवार पोस्न राजनीतिमा नआएकाे जिकिर गरे । उनले भने, 'राजनीति मेरो सेवा हो मलामी कमाउने भन्दा माथिको स्वार्थ छैन ।’

‘जनतामा गएको छु जनजनको पिर, मार्का र व्यथा बुझेको छु । कहिले काहीँ देशको स्थिति देखेर एकान्तमा भक्कानिएर रोएको पनि छु,’ उनले भने, ‘हेटौंडाकाे हुप्र चाैरमा १३ तले भ्यूटावर बनाउनु सट्टा हेटौंडा अस्पतालमा १३ तल्ले भवन (अस्पताल) हेटौंडा उप-महानगरपालिकाले बनाइनु पर्छ ।’ न्याैपानेले मकवानपुरका लागि सपना देखेको र साकार पार्ने संकल्प बोकेरे हिँडेको बताए ।

जनतालाई भेडा भन्ने एक जमात र जनतालाई दास ठान्ने राजनीतिक दलहरूलाई विवेक पुर्‍याउने बेला निर्वाचन आएको भन्दै उनले मकवानपुरको जनता जाग्ने बेला भएकाे बताए । 'नयाँ इतिहासको उदय हुनेमा ढुक्क छु । जनताको सेवक बनेर काम गर्ने छु,' उनले भने ।