बाँकेमा कोभिड संक्रमित महिलाले जन्‍माइन् स्वस्थ बच्चा

प्रतिकात्‍मक तस्‍बिर

बुटवल : बाँकेमा कोभिड-१९ संक्रमित एक महिलाले स्वस्थ बच्चा जन्माएकी छिन्। सुर्खेत, भेरीगंगा नगरपालिका ११ बस्ने २२ वर्षीया महिलाले बच्चा जन्माएकी हुन्। नेपालगन्ज मेडिकल कलेजका उपनिर्देशक डा. नितेशकुमार कनोडियाकाअनुसार महिलालाई तीन दिनदेखि ज्वरो आएको थियो। 
 
मेडिकल कलेजमा बुधबार पीसीआर परीक्षण गराउँदा कोरोना संक्रमण देखिएको थियो । बिहीबार आज बिहान ७ बजेर ४० मिनेट जाँदा महिलाले बच्चा जन्माएको अस्पतालले जनाएको छ । अहिले आमा र बच्चाको स्वास्थ्य अवस्था सामान्य रहेको डा. कनोडियाले बताए।  

जिल्ला कोभिड संकट ब्यवस्थापन केन्द्रका फोकल पर्सन तेज वलीले कोरोना संक्रमणबाट धेरैजसो व्यक्तिको अवस्था गम्भीर भइरहेको अवस्थामा संक्रमित महिलाले स्वस्थ बच्चा जन्माउनु सुखद पक्ष भएको बताएका छन्।