ट्राफिक महाशाखाले भन्योः नागरिक एपमा भएको लाइसेन्स र ब्लु बुक मान्दैनौँ

काठमाडौँ- काठमाडौँ उपत्यका ट्राफिक महाशाखाले ‘नागरिक एप’ मा भएको लाइसेन्स र ब्लु बुकलाई (सवारी चालक अनुमति पत्र/ सवारी दर्ता किताबलाई) नमान्ने भएको छ । सवारी चालकले सवारीसाधन चलाउँदा लाइसेन्स तथा सवारी दर्ता किताब साथमा राख्नुपर्ने महाशाखाले जनाएको छ ।

‘नागरीक एप’ मा कागजपत्रलाई मान्न नसकिने र ऐनको दफा ६० बमोजिम ५ पटकभन्दा बढी सवारी नियम उल्लंघन गर्ने चालकको अनुमतिपत्र ६ महिनाको लागि निलम्बन गरिने महाशाखाले उल्लेख गरेको छ ।

सवारी तथा यातायात व्यवस्था ऐन,२०४९ को दफा १३१ बमोजिम कुनै पनि सवारी चालकले चालक अनुमतिपत्र प्रहरी वा यातायात निरीक्षकले जाँचबुझको सिलसिलामा हेर्न खोजेमा देखाउनुपर्ने व्यवस्था रहेको छ ।

तथा सोही ऐनको दफा १६४ को उपदफा १(न) बमोजिम चालक अनुमतिपत्र साथमा नराखी सवारी चलाएमा यातायात निरीक्षक वा प्रहरीले तत्काल सजाय गर्न सक्ने व्यवस्था रहेको छ।

यसका साथै सवारी नियम उल्लंघन भएको खण्डमा यातायात निरिक्षक वा प्रहरीले सवारी सम्बन्धी सक्कल कागजपत्र लिई २४ घण्टे पुर्जी जारी गर्ने महाशाखाले जानकारी दिएको छ ।

नागरिक एपबाट उक्त कागजपत्र निलम्बनमा परे नपरेको यकिन नहुने हुँदा हालको प्रावधान बमोजिम चालकले सवारी कागजपत्र साथमा राखेर सवारीसाधन चलाउनु पर्ने महाशाखाले प्रस्ट पारेको छ ।