अदालतमा प्रतिकूल बयान दिने सरकारी साक्षी भ्रष्टाचार अभियोग खेप्दै

काठमाडौं– भ्रष्टाचार मुद्दामा प्रतिकूलमा बयान दिएको अभियोगमा अख्तियार दुरुपयोग अनुसन्धान आयोगले सरकारी साक्षीलाई पनि १ लाख ५० हजार रुपैयाँको भ्रष्टाचार अभियोग लगाएको छ । आयोगले अदालतमा सरकारी साक्षीका रुपमा पेश भएकी भावना महतले प्रतिकूलमा बयान दिएपछि मतियारका रुपमा भ्रष्टाचार अभियोग लगाउँदै बुधबार मुद्दा दर्ता गरेको हो ।

आयोगले मालपोत कार्यालय ताप्लेजुङमा कार्यरत तत्कालीन मालपोत अधिकृत लेखा पनेरु महतविरुद्ध १ लाख ५० हजार रुपैयाँ भष्टाचार गरेको मुद्दा विशेष अदालतमा दर्ता गरेको थियो । उक्त मुद्दामा सरकारी साक्षीका रुपमा भावना महतलाई पेश गरेको थियो । तर उनले अदालतमा प्रतिकूल बकपत्र गरेपछि उनीविरुद्ध आयोग अनुसन्धानमा गयो र भ्रष्टाचार मुद्दा लगाउने निर्णय पुगेको हो ।

अभियुक्त लेखा पनेरु संलग्न भ्रष्टाचार मुद्दामा घुसबापतको रकम राखिदिने उनै भावना महत थिइन् । उनले उक्त मुद्दाको अनुसन्धानको क्रममा सरकारी साक्षी बनेपछि उनलाई अभियुक्त बनाइएन । उनले पाउने सजायमा पूर्ण छुट दिँदै प्रतिवादी पनि नबनाइकन सरकारी साक्षीका रुपमा पेश गरिएको थियो ।

उनले आयोगमा दिएको बकपत्रकै आधारमा पनेरुलाई भ्रष्टाचार मुद्दा चलाएको थियो । तर, आयोगमा दिएको बकपत्रको प्रतिकूल हुने गरी अदालतमा बयान दिएपछि उनलाई पनि भ्रष्टाचार मुद्दा चलाएको हो ।

आयोगले भ्रष्टाचार गर्नेको मतियार बनेको कसूर लगाएको छ । सजायका हकमा भने कर्मचारीलाई हुने सजायको आधा मागदावी लिएको छ ।