एसीसी प्रिमियर कप विजेता क्रिकेट खेलाडीलाई जनही ६ लाख दिने सरकारको निर्णय

काठमाडौँ- एसीसी प्रिमियर कप जितेको नेपाली राष्ट्रिय क्रिकेट टिमका खेलाडीहरुले जनही ६ लाख रुपैयाँ पाउने भएका छन् । नेपाल सरकारले पुरस्कारस्वरुप खेलाडीहरुलाई जनही ६ लाख दिने भएको हो ।

बुधबार बसेको मन्त्रिपरिषद बैठकले नेपाली टिमका खेलाडी तथा मुख्य प्रशिक्षकलाई जनही ६ लाख तथा राष्ट्रिय क्रिकेट टिमका अफिसियललाई जनही ३ लाख दिने निर्णय गरेको हो ।

कीर्तिपुरस्थित त्रिवि क्रिकेट मैदानमा भएको एसीसी प्रिमियर कपको फाइनलमा नेपालले यूनाइटेड अरब इमिरेट्स (यूएई) लाई सात विकेटले पराजित गर्दै नेपालले एसिया कपमा स्थान बनाएको थियो ।

त्यसैगरी, त्रिवि मैदानलाई अन्तर्राष्ट्रिय स्तरको बनाउन आगामी आर्थिक वर्षमा विशेष प्राथमिकतामा राख्ने समेत मन्त्रिपरिषद बैठकले निर्णय गरेको छ ।