आत्मसमर्पण क्रान्तिप्रति गद्दारी हो भन्‍ने कुरा हामीलाई राम्ररी थाहा छ : भुसाल

फाइल तस्‍बिर

काठमाडौँ : नेकपा एमालेका नेता घनश्‍याम भुषालले झलनाथ–माधवलाई गाली गरेर नेकपा एमालेलाई विभाजित गर्न खोजिएको बताएका छन् । सामाजिक सञ्‍जाल फेसबुकमार्फत प्रतिक्रया दिँदै भुषालले हिजो पनि प्रचण्डलाई गाली गरेर पार्टी विभाजन(तत्‍कालीन नेकपा)को पाप ढाक्ने प्रयास भएको स्‍मरण गरेका छन् । 'हिजो प्रचण्डलाई गाली गरेर पार्टी विभाजनको पाप ढाक्ने प्रयास भयो,' उनले लेखेका छन्, 'आज झलनाथ–माधवलाई गाली गरेर बाँकी रहेको नेकपा एमालेलाई विभाजित गरिँदैछ ।'

उनले नेपालमा संविधान जारी हुँदा असफल भएका र विघटित प्रतिनिधिसभा पुन:स्‍थापित हुँदा दोश्रो पटक पनि असफल भएका शक्तिहरूले चुनावको नाममा फेरि प्रतिनिधिसभा विघटन गराएर बदला लिन कस्सिएका छन् भन्ने दाबीको खण्डन नहुन उनको भनाइ छ । उनले विद्रोहले क्रान्तिमा योगदान गर्छ कि गर्दैन भन्ने विषयमा इतिहासमा ठूलो विवाद रहेको भन्‍दै आत्मसर्पण क्रान्तिप्रति गद्दारी हो भन्ने कुरा आफूहरूलाई राम्ररी थाहा भएको टिप्‍पणी गरेका छन् ।

'आज हामीविरुद्ध गरिएका गालीगलौज वा आलोचनाले नेपालमा संविधान जारी हुँदा असफल भएका र विघटित प्रतिनिधिसभा पुन:स्‍थापित हुँदा दोश्रो पटक पनि असफल भएका शक्तिहरूले चुनावको नाममा फेरि प्रतिनिधिसभा विघटन गराएर हामीसँग बदला लिन कस्सिएका छन् भन्ने दाबीको खण्डन हुँदैन', उनले भनेका छन्, ' विद्रोहले क्रान्तिमा योगदान गर्छ कि गर्दैन भन्ने विषयमा इतिहासमा ठूलो विवाद छ । तर, आत्मसमर्पण क्रान्तिप्रति गद्दारी हो भन्ने कुरा हामीलाई राम्ररी थाहा छ ।'