तीन दलका शीर्ष नेताको भेटवार्ताले आशंका पैदा भयो : मनिष झा

काठमाडौँ– राष्ट्रिय स्वतन्त्र पार्टी (रास्वपा)का सांसद मनिष झाले नक्कली भुटानी शरणार्थी प्रकरणउपर छानबिन अगाडि बढिरहेका बेला तीन दलका शीर्ष नेताहरूबीचको भेटवार्ताले आशंका सिर्जना भएको बताएका छन् ।

सोमबारको प्रतिनिधिसभा बैठकमा बोल्दै उनले मुलुकमा कुनै विपद् आउँदा वा अन्तर्राष्ट्रिय विषय हुँदा राजनीतिक दलका शीर्ष नेताहरू भेट्नु स्वाभाविक भए पनि अहिले त्यस्तो अवस्था नरहेको बताए । 

नक्कली शरणार्थी प्रकरणमा मुछिएको आरोप लागेका व्यक्तिहरू योजनाबद्ध रूपमा सार्वजनिक हुने मौका पाइरहेको पनि उनले जिकिर गरे । ‘हाम्रो देशमा ठूलो अपराध, देशद्रोही र भ्रष्टाचारको विषय छ । शंकास्पदहरूको नाम आउँछ,’ बैठकमा आकस्मिक समय लिएर उनले भने, ‘उनीहरूले आफ्नो मोबाइल फर्म्याट गर्ने, लुक्ने, समाचार सुल्झाउने र योजनाबद्ध रूपमा सार्वजनिक हुने मौका पाइरहेका छन् । केही त फरार पनि छन् रे । यस्तो किन हुन्छ ?’

भ्रष्टाचारलाई प्रभाव पार्ने व्यवहार र वातावरण हुन नहुने पनि उनले बताए ।