लियोनार्दोको नयाँ फिल्मलाई कानमा ९ मिनेटको ताली

फ्रान्स - मार्टिन स्कोरसी र लियोनार्दो डिकाप्रियोको जोडी फिल्म बनाउने मामलामा सधैँ सफल मानिन्छ । मार्टिन स्कोरसीले निर्देशन गरेका र लियोले अभिनय गरेका फिल्म बक्स अफिस र समीक्षक दुवैको नजरमा अब्बल ठहरिएका छन् । निर्देशक कलाकारको यो जोडी फेरि एक पटक ‘किलर अफ दि फ्वावर मुन’ फिल्ममार्फत दर्शकसामु आउँदैछ । तर रिलिजपूर्व नै यो फिल्मले अनेक शीर्षकमा चर्चा पाइरहेको छ । 

सबैभन्दा पहिला त यो फिल्मको लम्बाइलाई लिएर चर्चा सुरु भएको थियो । सर्वप्रथम यसको समाचार आउँदा यसको लम्बाइ ४ घन्टा भएको बताइएको थियो । तर पछि यसको लम्बाइ साढे ३ घन्टा बनाइयो । फिल्ममा रबर्ट डी निरो र लियोनार्दो हुँदा चर्चा त हुने नै भयो । अहिले यही साढे ३ घन्टाको लम्बाइसहित कान पुगेको फिल्मले ९ मिनेट लामो स्ट्यान्डिङ ओभेसन पाएको छ ।

शनिबार स्क्रिनिङ भएको फिल्मलाई दर्शकले ९ मिनेटसम्म ताली बजाएर उत्कृष्ट रहेको सन्देश दिएका थिए । फिल्ममा लियो र रबर्टको उपस्थितिमा पनि लिली ग्लाडस्टोनले अभिनयबाट सबैको मन जितेको खबर छ । फिल्मपछि उनको अभिनयका लागि पनि दर्शकले गडगडाहट तालीले अनुमोदन गरेका थिए । उनले आउँदो दिनमा ओस्कारका लागि पनि क्याम्पेन गर्ने जनाएकी छिन् । 
फिल्मले आदिवासी जनजातिको शृंखलावद्ध हत्याको कथा प्रस्तुत गर्छ ।