बागमती प्रदेश महिला फुटबल : उपाधिका लागि सिन्धुली र काठमाडौं भिड्ने

मकवानपुर । बागमती प्रदेश खेलकुद प्रतियोगिताअन्तर्गत महिला फुटबल प्रतियोगिताको उपाधिका लागि सिन्धुली र काठमाडौं जिल्लाबीच भिडन्त हुने भएको छ । हेटौँडा–६ स्थित गौरिटार रंगशालामा बुधबार भएको पहिलो सेमिफाइनल खेलमा नुवाकोटलाई ३–० गोलअन्तरले पराजित गर्दै सिन्धुली फाइनल प्रवेश गरेको हो भने काठमाडौंले चितवनलाई २–० गोलअन्तरले पराजित गर्दै फाइनल यात्रा तय गरेको हो ।

फाइनल खेल भोलि बिहीबार दिउँसो २ बजे गौरिटार रंगशालामा हुनेछ । सिन्धुलीलाई सहज जित दिलाउने क्रममा रचना लोले चौथो मिनेटमा र सोनिका परियारले आठौं मिनेटमा गोल गरिन् । पहिलो हाफमा २–० गोलअन्तरले अगाडि रहेको सिन्धुलीले दोस्रो हाफमा थप एक गोल गर्‍यो । सिन्धुलीका लागि वितिसा बम्जनले ५६औं मिनेटमा तेस्रो गोल गरिन् ।

आज बुधबार नै भएको दोस्रो सेमिफाइनल खेलमा काठमाडौंले चितवनलाई पराजित गरेको हो ।

काठमाडौंका खेलाडीले ३० औं मिनेटमा प्रहार गरेको बल चितवनकी एलिना तामाङले बचाउन खोज्दा डिफ्लेक्ट भई गोलमा परिणत हुँदा चितवन १ गोलले पछि परेको थियो । दोस्रो हाफमा काठमाडौंका लागि सरस्वती ऐरले गोल गर्दै २–० को नतिजा निकालेको हो । पहिलो सेमिफाइनल खेलमा सिन्धुलीकी रेनुका जर्घा मगर र दोस्रो सेमिफाइनल खेलमा काठमाडौंकी सुजिता घलान प्लेयर अफ द म्याच घोषित भइन् । महिला फुटबलमा ललितपुर, सिन्धुपाल्चोक, रसुवा र दोलखा जिल्ला महिला फुटबलमा सहभागी छैनन् ।