नेपाललाई सहयोग गर्न मित्र राष्ट्र र अन्तर्राष्ट्रिय संघ संस्थालाई देउवाको आह्वान

काठमाडौँ  : नेपाली कांग्रेसका सभापति तथा पूर्वप्रधानमन्त्री शेरबहादुर देउवाले कोभिडबाट आक्रान्त नेपाललायृ सहयोग गर्न आह्वान गरेका छन् । आज एक विज्ञप्ति जारी गरी सभापति देउवाले केपी शर्मा ओली नेतृत्वको सरकार महामारी नियन्त्रण गर्न गम्भीर र जिम्मेवार नबनेको आरोप लगाउँदै यस्तो आह्वान गरेका हुन् ।  

‘कोभिड—१९ को संक्रमणले उग्र रुप लिइरहेको छ । देशभरिका अस्पतालहरूमा कोभिड संक्रमितका लागि अत्यावश्यक अक्सीजन, भेन्टीलेटर सहितका आईसीयु बेड र औषधीको नितान्त अभाव भई सकेको छ,’ देउवाद्वारा जारी विज्ञप्तिमा भनिएको छ, ‘सुदूरपश्चिमलगायतका दुर्गम स्थानहरु र देशभरिमा नै अक्सिजन अभावले ठूलो संख्यामा मानिसको मृत्यु भइरहेको छ । सरकार यस विषयमा अहिलेसम्म पनि गम्भीर र जिम्मेवार देखिएको छैन ।’ 

उनले सरकारलाई भविष्यमा आउनसक्ने संकटलाई मध्यनजर गरी सबै जिल्लामा अक्सिजन प्लान्ट पीसीआर परीक्षण प्रयोगशाला स्थापना गर्न पनि आग्रह गरेका छन् । ‘म सरकारसँग भविष्यमा आउन सक्ने जटिल परिस्थितिलाई मध्यनजर गरी सबै जिल्लामा अक्सीजन प्लान्ट र पीसीआर परिक्षण प्रयोगशाला स्थापना गर्न र तत्कालका लागि आवश्यक अक्सीजन, आईसीयू बेड, खोप लगायतका औषधीको  व्यवस्था गर्न माग गर्दछु,’ देउवाले भनेका छन्, ‘यस विषम घडीमा मित्रराष्ट्र र अन्तर्राष्ट्रिय संघ, संस्थाहरुलाई आवश्यक सहयोग गरिदिन हुन पनि अपील गर्दछु ।’ 

देउवाले कांग्रेसका नेता कार्यकर्तालाई  स्वास्थ्य मापदण्ड पालना गरेर संकटमा परेकालाई सहयोग गर्न पनि अपील गरेका छन् ।