एसिया कप : नेपालले भोलि पाकिस्तानविरुद्ध खेल्ने

काठमाडौँ- हङकङमा आज (साेमबार) बाट सुरु भएको एसीसी वुमन्स इमर्जिङ टिम्स एसिया कपको पहिलो खेलमा नेपालले भोलि पाकिस्तान ‘ए’ को सामना गर्ने भएको छ । समूह ‘ए’ मा रहेका नेपाल र पाकिस्तानबीचको खेल टिन क्वोन रोड रिक्रियसन ग्राउन्डमा नेपाली समयअनुसार विहान ६:४५ बजेबाट सुरु हुनेछ ।

समूह ‘ए’ मा नेपाल र पाकिस्तान ‘ए’ सँगै आयोजक हङकङ र भारत ‘ए’ टिम रहेका छन् । समूह ‘बी’ मा भने बंगलादेश ‘ए’, श्रीलंका ‘ए’, यूएई र मलेसिया रहेका छन् ।

समूह ‘बी’ अन्तर्गत सोमबार भएको खेलमा बंगलादेशले मलेसियालाई ९७ रन तथा श्रीलंकाले यूएईलाई ३ विकेटले पराजित गरेका छन् ।

नेपालले दोस्रो खेल भारतविरुद्ध जुन १५ तथा तेस्रो खेल हङकङविरुद्ध जुन १७ मा खेल्ने तालिका रहेको छ ।

समूह चरणको खेलपछि दुवै समूहका शीर्ष दुई टोली सेमिफाइनल प्रवेश गर्नेछन् । फाइनल जुन २१ मा हुने तालिका रहेको छ ।