नेपाल विश्वविद्यालय अगाडि बढ्नेमा शंका छ : सांसद पन्त

काठमाडौँ– प्रमुख प्रतिपक्षी दल नेकपा एमालेका सांसद रघुजी पन्तले नेपाल विश्वविद्यालय राम्ररी अगाडि बढ्नेमा आशंका व्यक्त गरेका छन् । आइतबारको प्रतिनिधिसभा बैठकमा नेपाल विश्वविद्यालय विधेयक २०८० माथिको सामान्य छलफलमा भाग लिँदै सांसद पन्तले नेपाल विश्वविद्यालयको भविष्यमाथि आशंका गरे । 

उनले त्रिभुवन विश्वविद्यालय नै राम्ररी चल्न नसकेको भन्दै नेपाल विश्वविद्यालय कति अगाडि बढ्ला भन्नेमा शंका गर्ने ठाउँ रहेको उल्लेख गरे । लिबरल आर्ट पढाउनु जरुरी रहेको उनको भनाइ छ । 

‘यसमा सरकारलाई आर्थिक दायित्व नपर्ने र लिबरल आर्टलाई अलि नयाँ ढंगले पढाउँछौँ भनेर आउनुभएको छ भने लिबरल आर्ट जरुरी छ । किन भने अहिले लिबरल आर्ट भनेको डाक्टर, इन्जिनियर र वैज्ञानिकलाई पनि आर्ट पढाउनुपर्छ । आर्टको केही पक्ष पढाउनुपर्छ । किन भने डाक्टर, इन्जिनियर मेनपावर भनेको पनि रोबर्ट जस्तो होइन । मानवीय हुनुपर्छ । मानवीय बनाउने विषय लिबरल आर्ट हो,’ उनले भने, ‘त्यसैले, लिबरल आर्टसँग सम्बन्धित राम्रा कलेजहरू चाहिन्छ । तर, टियु नै यस विषयमा राम्ररी चल्न नसकेको, टियुसँग सम्बन्धन प्राप्त कलेजहरू नै राम्ररी अगाडी बढ्न नसकेको अवस्थामा यो विश्वविद्यालय कति अगाडि बढ्ला अलिकति शंका गर्ने ठाउँ छ ।’ 

उनले लिबरल आर्टसम्बन्धी कलेजहरूको आवश्यकता रहेको उल्लेख गरे ।