प्रधानमन्त्री र शिक्षामन्त्रीलाई कारबाहीको माग गर्दै आयोगमा कांग्रेसको उजुरी

काठमाडौँ : प्रमुख प्रतिपक्षी दल नेपाली कांग्रेसले प्रधानमन्त्री केपी शर्मा ओली र शिक्षामन्त्री कृष्ण गोपाल श्रेष्ठलाई कारबाहीको माग गरेकोछ । कांग्रेस संसदीय दलले निर्वाचन आयोगमा उजुरी दर्ता गरेर प्रधानमन्त्री र शिक्षामन्त्रीलाई कारबाहीको माग गरेको हो । 

राष्ट्रिय सभा उपनिर्वाचनको मौन अवधि सुरु भइसकेको अवस्थामा आफ्ना उमेदवारको पक्षमा मत मागेपछि कांग्रेसले उजुरी दिएको जनाएको छ ।  प्रधानमन्त्री ओली र शिक्षा मन्त्री श्रेष्ठले राष्ट्रिय सभा उपनिर्वाचनमा एमालेबाट उमेदवार रहेका रामबहादुर थापालाई भोट मागेका थिए । 
 
‘निर्वाचन आयोगले निर्वाचन आचार संहिता, २०७२ को दफा ५ घ (३ं), (५) र दफा (६) विपरीत कार्य गर्ने जो कोहीलाई कारबाही गर्न यो बैठक जोडदार माग गर्दछ,’ बैठकको निर्णयसहित उजुरीमा भनिएको छ ।