जटिल समयका बावजुद घोषित मितिमा निर्वाचन हुनुपर्छ : ओली

काठमाडौँ : प्रधानमन्त्री केपी शर्मा ओलीले जटिल समयका बावजुद घोषित मितिमा निर्वाचन गर्न आवश्यक तयारीमा जुट्न उनले निर्वाचन आयोगलाई आग्रह गरेका छन् । प्रमुख निर्वाचन आयुक्त दिनेश थपलियासहित अन्‍य आयुक्तलाई बालुवाटारमा नै बोलाएर त्यस्तो आग्रह गरेका हुन् । 

मुलुुकलाई यतिबेला निर्वाचन नै आवश्यक देखिएको भन्दै आयोगले आफ्नो तयारी थाल्नुपर्ने धारणा ओलीले राखेको र मुलुक अब निर्वाचनमा गएको भन्दै सबै पक्ष उत्तिकै सक्रिय रहेर समयमा निर्वाचन गर्न पर्ने बताएका ओलीका सल्लाहकार सूर्य थापाले जानकारी दिए । ओलीले मुलुक अब निवार्चनमा होमिएको पनि बताएका थिए ।

संविधानको धारा ७६ को उपधारा ५ बमोजिम सरकार गठन हुन नसकेपछि प्रतिनिधि सभा विघटन भएको हो । आगामी कात्तिक २६ र मंसिर ३ मा निर्वाचनको मिति तोकिएकोले यसलाई त्यसमा अब दायाँबायाँ नभै फत्ते गर्न पर्ने जिम्मेवारी सरकारको रहेको उनले बताए । 

मन्त्रिपरिषद्को सिफारिसमा राष्ट्रपतिले मिति तोकेलगत्तै प्रधानमन्त्रीले निर्वाचन आयोगका प्रमुख आयुक्त थपलियासहित आयुक्तहरूसँग बालुवाटारमा छलफल गर्दै निर्वाचनको अवस्था बारेमा जानकारी लिएका हुन । छलफलमा उपप्रधानमन्त्री ईश्वर पोखरेल, संविधानसभा अध्यक्ष सुवास नेम्वाङ, पूर्वमहान्यायाधिवक्ता अग्‍नि खरेलसमेतको सहभागीता थियो ।