विघटन निरंकुश र अधिनायकवादी डकैती : पाँच विद्यार्थी संगठन

काठमाडौँ : विपक्षी राजनीतिक दलहरूसम्बद्ध विद्यार्थी संगठनहरूले प्रतिनिधि सभा विघटन सार्वभौम जनतामाथि गरिएको निरंकुश र अधिनायकवादी डकैती भएको बताएका छन् । 

नेपाल विद्यार्थी संघका अध्यक्ष राजिव ढुंगाना, अखिल (क्रान्तिकारी)का अध्यक्ष रंजित तामाङ, अनेरास्ववियु अध्यक्ष सुदेश पराजुली, समाजवादी विद्यार्थी युनियन अध्यक्ष रुपनारायण श्रेष्ठ र अखिल (छैठौं) का अध्यक्ष विमल पोखरेलले स‌युक्त विज्ञप्ति जारी गर्दै विघटनको विरोध गरेका हुन् ।

'सर्वोच्च अदालतले पुनःस्थापना गरेको संसद्को दोस्रो पटकको विघटन सार्वभौम जनतामाथि गरिएको निरंकुश र अधिनायकवादी डकैती हो । संयुक्त विद्यार्थी आन्दोलनको तर्फबाट संसद विघटनको घोर निन्दा र भत्सर्ना गर्दछौं,' संयुक्त विज्ञप्तिमा उल्लेख छ । 

संसद्को विघटनले संविधानमाथि प्रहार भएको र सरकार निरंकुश, अधिनायकवादी र स्वेच्छाचारी बनेको आरोप विज्ञप्तिमा लगाइएको छ । संसदीय मूल्य, मान्यता, परम्परालाई तिलाञ्‍जली दिंदै प्रधानमन्त्री र राष्ट्रपतिको मिलेमतोमा भएको संसद् विघटनले वर्तमान सरकार असफल भइसकेको प्रमाणित भएको उनीहरूको भनाइ छ ।