म्यानचेस्टर सिटी पराजित हुँदा आर्सनल र टोटेनहम विजयी

काठमाडौँ- इंग्लिस प्रिमियर लिग फुटबलअन्तर्गत साविक विजेता म्यानचेस्टर सिटीले पहिलो पराजय भोगेको छ ।

शनिबार राति भएको खेलमा सिटीले उल्भ्ससँग २-१ गोलअन्तरको पराजय भोगेको हो । उल्भ्सको जितमा ह्वाङ हि-चानले एक गोल गर्दा सिटीका रुवेन डियाजले एक आत्मघाती गोल गरे । सिटीका लागि जुलियन अल्भारेजले एक गोल फर्काए ।

यससँगै अघिल्ला ६ वटै खेलमा जित हात पारेको सिटीले पहिलो पराजय भोगेको हो । शीर्ष स्थानमा रहेको सिटीले ७ खेलबाट १८ अंक जोडेको छ ।

यता आर्सनलले भने बर्नमाउथलाई ४-० ले हरायो । आर्सनलको जितमा बुकायो साका, मार्टिन ओडेगार्ड, काई हाभार्ज र बेन ह्वाइटले एक-एक गोल गरे ।

त्यसैगरी, टोटेनहमले लिभरपुललाई २-१ ले पराजित गर्‍यो । टोटेनहमको जितमा सन हियोङ-मिनले एक गोल गर्दा लिभरपुलका जोएल हाटिपले एक आत्मघाती गोल गरे । लिभरपुलका लागि कोडी गाक्पोले एक गोल फर्काए ।

जितसँगै समान ७ खेलबाट समान १७-१७ अंक जोडेका टोटेनहम र आर्सनल दोस्रो र तेस्रो स्थानमा उक्लिएका छन् । टोटेनहम गोलअन्तरमा आर्सनल भन्दा माथि रहेको छ ।